सङ्खुवासभा :- राष्ट्रपति रामचन्द्र पौडेलले मुलुकको समृद्धिमा बाधक बनेको बेथितिको अन्त्य गर्दै सुशासन र पारदर्शी सेवा प्रवाह गर्नु सबै राष्ट्रसेवकको पहिलो जिम्मेवारी हुनुपर्नेमा जोड दिनुभएको छ।
मादी माध्यमिक विद्यालय, सङ्खुवासभामा आयोजित हीरक महोत्सव कार्यक्रममा सम्बोधन गर्दै उहाँले शिक्षालाई प्रविधि, सीप, क्षमता र उद्यमशीलतासँग जोडेर जीवनोपयोगी बनाउनुपर्नेमा बल दिनुभयो।
राष्ट्रपति पौडेलले विद्यमान शिक्षा प्रणालीलाई आधुनिक, विज्ञान–प्रविधि मैत्री तथा अनुसन्धान–अन्वेषण केन्द्रित बनाउन पाठ्यक्रम, सिकाइ प्रक्रिया र अध्यापन विधिमा सुधार आवश्यक रहेको बताउनुभयो। उहाँले गाउँस्तरमा साना–ठूला कृषि उद्यम स्थापना, उत्पादन वृद्धि, रोजगारी सृजना, डिजिटल अर्थतन्त्र र पूर्वाधार विकाससँग शिक्षालाई जोड्नुपर्ने र शिक्षा, स्वास्थ्य, रोजगारीजस्ता आधारभूत क्षेत्रलाई सरकारले उच्च प्राथमिकतामा राख्नुपर्ने धारणा राख्नुभयो।
उहाँले शिक्षा समृद्धिको आधार भएकाले सीप विकाससँग जोडेर लगानी गर्नुपर्ने, र राजनीतिक परिवर्तन तथा आधुनिक समयको मागअनुसार गुणस्तरीय तथा समयसापेक्ष शिक्षा आजको आवश्यकता भएको उल्लेख गर्नुभयो।
राष्ट्रपति पौडेलले दिनहुँ ठूलो सङ्ख्यामा विदेशिने युवा शक्तिलाई स्वदेशको विकास, निर्माण र स्वरोजगारमा आबद्ध गर्न व्यावसायिक वातावरण सुधार गरी रोजगारीका अवसर सिर्जना गर्नुपर्नेमा जोड दिनुभयो। उहाँले भन्नुभयो, “श्रमको सम्मान गर्ने संस्कृति विकास गर्नुपर्छ। सीपमूलक शिक्षा र गाउँमा रोजगारी र आम्दानीको वातावरण निर्माण गरी विदेश पलायन भइरहेका युवालाई स्वदेशमै रोक्न सकिन्छ।”
राष्ट्रपति पौडेलले नेपाली जनताको बलिदान, त्याग र सङ्घर्षबाट प्राप्त सङ्घीय लोकतान्त्रिक गणतन्त्रमार्फत स्वतन्त्रता र विकासको उज्यालो मार्गमा मुलुक अघि बढिरहेको बताउनुभयो।
सङ्खुवासभाको प्राकृतिक संरचना र पर्यटकीय सम्भावनालाई औँल्याउँदै उहाँले जलविद्युत् उत्पादनमा अग्रणी यस जिल्लालाई आर्थिक दृष्टिले फाइदा पुग्ने गरी छिमेकी चीनसँग जोडिएको किमाथाङ्का नाका व्यवस्थित गर्न सकिने सम्भावनामा पनि प्रकाश पार्नुभयो।
तपाईको प्रतिक्रिया
सम्बन्धित खवर
