काठमाडौँ :- एसियाली खेलकुदअन्तर्गत पुरुष क्रिकेट छनोट प्रतियोगिताको उपाधि नेपालले जितेको छ। सिङ्गापुरमा आज सम्पन्न फाइनल खेलमा नेपालले हङकङलाई डकवर्थ–लुइस (डीएलएस) पद्धतिअनुसार १९ रनले पराजित गर्दै च्याम्पियन बन्न सफल भयो।
हङकङले दिएको १८९ रनको लक्ष्य पछ्याउने क्रममा नेपालले ११.३ ओभरमा दुई विकेट गुमाएर ११४ रन बनाएको थियो। त्यसपछि वर्षाका कारण खेल रोकिएको र पुनः सुरु हुन नसकेपछि डीएलएस पद्धतिअनुसार नेपाललाई विजेता घोषित गरिएको हो।
नेपालका लागि ओपनर कुशल भूर्तेलले उत्कृष्ट ब्याटिङ गर्दै ४० बलमा ६५ रन बनाए। उनले आठ चौका र तीन छक्का प्रहार गरे। कप्तान रोहित पौडेलले ३५ रनको योगदान दिए भने अर्का ओपनर आसिफ शेख शून्यमै आउट भए।
यसअघि टस हारेर पहिले ब्याटिङ गरेको हङकङले निर्धारित २० ओभरमा सात विकेट गुमाएर १८८ रन बनाएको थियो। हङकङका अशुंमन रथले ८० रन तथा सहिद वासिफले ५५ रनको योगदान दिएका थिए।
बलिङतर्फ नेपालका शेर मल्लले चार विकेट लिएर प्रभावशाली प्रदर्शन गरे। करण केसीले दुई तथा सन्दीप लामिछानेले एक विकेट हात पारे।
नेपाल सेमिफाइनलमा ओमानलाई हराउँदै फाइनल पुगेको थियो भने हङकङले मलेसियालाई पराजित गर्दै उपाधि भिडन्त तय गरेको थियो। दुवै टोली आगामी सेप्टेम्बरमा जापानमा हुने एसियाली खेलकुदका लागि छनोट भइसकेका छन्।
तपाईको प्रतिक्रिया
सम्बन्धित खवर
