काभ्रे :- काभ्रेपलाञ्चोक क्षेत्र नं. २ बाट निर्वाचित प्रतिनिधिसभा सदस्य बदन कुमार भण्डारीले काठमाडौंको कपन क्षेत्रमा सचिवालय तथा सम्पर्क कार्यालय सञ्चालनमा ल्याएपछि मतदाताले सामाजिक सञ्जालमा तीव्र आलोचना सुरु गरेका छन भण्डारी काभ्रे क्षेत्र न २ बाट फराकिलो मतान्तरले बिजयी भएका साम्सद हुन ।
स्थानीयवासी तथा सामाजिक सञ्जाल प्रयोगकर्ताहरूले काभ्रेबाट निर्वाचित जनप्रतिनिधिले जिल्लामै बसेर सेवा दिनुपर्नेमा राजधानी केन्द्रित गतिविधि बढाएको आरोप लगाएका छन्। “जनताले काभ्रेमा भेट्न खोज्दा काठमाडौं आउनुपर्ने अवस्था किन ?” भन्ने प्रश्न धेरैले उठाएका छन्।
कार्यालयको बोर्डमा “प्रतिनिधि सभा सदस्य, काभ्रेपलाञ्चोक क्षेत्र नं. २ सचिवालय” भनेर काठमाडौमा राखेपछि आलोचना अझ चर्किएको हो । काभ्रेली जनताको मत लिएर जितेका सांसदले आफ्नो क्षेत्रमै सक्रिय हुनुपर्नेमा काठमाडौंमा सचिवालय खोलेर हास्यास्पद काम गरेको मतदाताको भनाइ छ।
सामाजिक सञ्जालमा कतिपयले “चुनावअघि जनतासँग नजिक, चुनावपछि काठमाडौंमै सीमित” भन्ने टिप्पणी गरेका छन्। केहीले सांसद भण्डारीमाथि काभ्रेका सडक, खानेपानी, शिक्षा र स्वास्थ्यजस्ता स्थानीय समस्याभन्दा राजधानीको राजनीतिक गतिविधिमा बढी केन्द्रित भएको आरोपसमेत लगाएका छन्।
काभ्रेकै केही युवाहरूले जनताको करबाट सुविधा लिने जनप्रतिनिधिले जिल्लामै स्थायी सेवा केन्द्र सञ्चालन गर्नुपर्ने माग गरेका छन्। उनीहरूका अनुसार सांसदको सचिवालय काठमाडौंबाट सञ्चालन हुँदा सामान्य सेवाग्राहीलाई पहुँचमा समस्या हुन सक्छ।
यद्यपि भण्डारी निकट स्रोतहरूले भने काठमाडौंमा सम्पर्क कार्यालय हुनु सामान्य प्रक्रिया भएको र संघीय राजधानीमा आवश्यक समन्वय तथा भेटघाटका लागि यस्तो कार्यालय खोलिएको दाबी गरेका छन्।
तर सामाजिक सञ्जालमा बढ्दो आलोचनाले काभ्रे क्षेत्र नं. २ मा सांसद भण्डारीप्रति असन्तुष्टि बढिरहेको संकेत गरेको छ।
तपाईको प्रतिक्रिया
सम्बन्धित खवर
