काठमाडौं :- बलिउड फिल्म ‘धुरन्धर’ सन् २०२५ मा विश्व बक्सअफिसमा ९०० करोडभन्दा बढी कमाइ गर्ने पहिलो भारतीय फिल्म बनेको छ। तेस्रो सप्ताहको अन्त्यमा पनि यसको बक्सअफिस प्रदर्शन स्थिर रहेको देखिन्छ। यसको अहिलेको गति कायम रहेमा, फिल्मले चाँडै १००० करोड भारुको कमाइ पार गर्ने अपेक्षा गरिएको छ।
भारतीय बक्सअफिसमा, मंगलबारसम्म फिल्मको कुल कमाइ ६१९.३० करोड भारु पुगेको छ। तेस्रो सप्ताहमा पनि यसको कमाइमा ठूलो गिरावट देखिएको छैन। तेस्रो सप्ताहको शुक्रबारमा २३.७० करोड, शनिबार ३५.७० करोड, आइतबार ४०.३० करोड, सोमबार १९.७० करोड र मंगलबार २०.४० करोड नेट कमाइ भएको छ।
फिल्मको कमाइ आगामी क्रिसमसको समयमासम्म अझै बढ्ने प्रक्षेपण गरिएको छ। बलिउड व्यापार विश्लेषक तरण आदर्शका अनुसार, फिल्म अब भारतीय बक्सअफिसमा ७०० करोड भारु पुग्न अघि बढिरहेको छ। ‘धुरन्धर’ फिल्मको कथा भारतीय विदेश मन्त्रालयले पाकिस्तानमा सञ्चालन गरेको जासूसी अपरेसनमा आधारित छ। फिल्ममा रणवीर सिंहले प्रमुख भूमिका निभाउँदै भारतीय जासूसको पात्रको अभिनय गरेका छन्।
तपाईको प्रतिक्रिया
