काभ्रे (खानिखोला) :- खानीखोला गाउँपालिकाका पाँच विद्यालयमा अध्ययनरत विद्यार्थीहरूलाई न्यानो कपडा तथा झोला वितरण गरिएको छ। गत बुधबार खानिखोला ३ धनमना स्थित श्री जनता आधारभूत विद्यालय र भाङ्टारबेँसी स्थित श्री कुमारी आधारभूत विद्यालयका विद्यार्थीलाई न्यानो कपडा तथा झोला वितरण गरिएको हो।
कार्यक्रम युवा नेता एवं समाजसेवी दैबलाल घिसिङ (अनुशिल) को प्रमुख आतिथ्यतामा र खानीखोला -३ नम्बर वडा अध्यक्ष सागर जिम्बाको विशेष उपस्थितिमा सम्पन्न भएको थियो। वितरण कार्यक्रममा विद्यार्थीहरूलाई ट्र्याकसुट, जुत्ता, मोजा, टोपी तथा झोला प्रदान गरिएको थियो। उक्त न्यानो कपडा सहयोग सामाजिक संस्था केटाकेटी नेपालको तर्फबाट प्रदान गरिएको हो। ग्रामीण भेकका विद्यार्थीहरुलाई सहयोगार्थ पाँचखाल -१ निवासी युवा समाजसेवी एवं व्यवसायी श्री सूर्य बहादुर तामाङले झोला उपलब्ध गर्नु भएको थियो । सहयोगका लागि संस्थाका आदरणीय अध्यक्ष भीम गोले, र सूर्यबहादुर तामाङलाई आयोजकले विशेष धन्यवाद व्यक्त गरेका छन्। यस कार्यक्रम सम्पन्न गर्नको लागि अविरल जिम्बा, दैवलाल घिसिङ र खानीखोला – ३ न. वडा अध्यक्ष सागर जिम्बाले पहल र सहजीकरण गरेका थिए । न्यानो कपडा वितरण कार्यक्रममा विद्यालयसम्म पुगेर सहयोग गर्ने सृजना थिङ, बिरेन्द्र ब्लोन, युवराज थापा मगर, गणेश जिम्बा, तिलक मोक्तान, पदम घिसिङ, बुद्धराज गोले, मिशन जिम्बा तथा सुमित जिम्बालाई विद्यालयले धन्यवाद व्यक्त गरेको छ। कार्यक्रमले चिसो मौसममा विद्यार्थीहरूको पठनपाठन सहज बनाउन महत्वपूर्ण सहयोग पुगेको सहभागीहरूको भनाइ छ।
तेस्तै हिजो खानीखोला गाउँपालिकाका विभिन्न विद्यालयमा अध्ययनरत विद्यार्थीहरूलाई न्यानो कपडा वितरण गरिएको छ। खानीखोला–२ सार्कीडाँडा स्थित श्री सेतीदेवी प्राथमिक विद्यालयमा संविधानसभा सदस्य अकल बहादुर थिङ (महेश) को प्रमुख आतिथ्यतामा न्यानो कपडा वितरण कार्यक्रम सम्पन्न भएको हो। यस कार्यक्रमको युवा नेता तथा समाजसेवी दैवलाल घिसिङ(अनुशील)ले पहल गरेका थिए।
कार्यक्रममा युवा नेता एवं समाजसेवी दैवलाल घिसिङ (अनुशील) र खानीखोला–३ का वडा अध्यक्ष सागर जिम्बाको विशेष उपस्थिति रहेको थियो। साथै समाजसेवी सृजना थिङ, बल बहादुर थिङ, युवराज थापा, राजकुमार भोलन, खानीखोला–२ का वडा सदस्य सुरज घिसिङ, पूर्व वडा सदस्य लालमान घिसिङ, कलाकार एवं समाजसेवी गणेश जिम्बा, समाजसेवी पदम घिसिङ र रिजा घिसिङलगायतको सहभागिता रहेको थियो।
कार्यक्रमअन्तर्गत विद्यार्थीहरूलाई स्थानीय निवासी भीम घिसिङद्वारा उपलब्ध गराइएको ट्र्याकसुट तथा पाँचखाल निवासी युवा समाजसेवी एवं व्यवसायी सूर्य बहादुर तामाङको सहयोगमा न्यानो कपडा वितरण गरिएको थियो।
यसैगरी खानीखोला–३ वडा अन्तर्गत चित्रे स्थित श्री केन्द्र ज्योति आधारभूत विद्यालय र जुरे स्थित श्री हनुमान शक्ति प्राथमिक विद्यालयमा पनि सामाजिक संस्था केटाकेटी नेपालको सहयोगमा ट्र्याकसुट, टोपी, जुत्ता तथा मोजा वितरण गरिएको छ।
कार्यक्रममा प्रमुख अतिथि संविधानसभा सदस्य अकल बहादुर थिङ (महेश), दैवलाल घिसिङ (अनुशील), वडा अध्यक्ष सागर जिम्बा, सृजना थिङ र युवराज थापाले मन्तव्य राख्दै विद्यार्थीहरूको पठनपाठनमा यस्ता सहयोग कार्यक्रमले सकारात्मक प्रभाव पार्ने बताए।
विद्यालय परिवारले सहयोगी संस्था तथा न्यानो कपडा उपलब्ध गराउन योगदान पुर्याउने सम्पूर्ण नेतृत्व र समाजसेवीहरूलाई स्वागत–सम्मान गर्दै हार्दिक धन्यवाद तथा आभार व्यक्त गरेको छ।
चिसो मौसममा सम्पन्न उक्त कार्यक्रमले विद्यार्थीहरूलाई राहत पुग्नुका साथै अध्ययनप्रति उत्साह बढाएको स्थानीयवासीहरूको भनाइ रहेको छ।
तपाईको प्रतिक्रिया
सम्बन्धित खवर
