रुपन्देही :- बुद्ध जन्मस्थल लुम्बिनीमा तेस्रो अन्तर्राष्ट्रिय बौद्ध सम्मेलन आयोजना हुने भएको छ। लुम्बिनी विकास कोषको आज बसेको परिषद् बैठकले आगामी वैशाख पूर्णिमाको अवसर पारेर लुम्बिनीमा अन्तर्राष्ट्रिय बौद्ध सम्मेलन गर्ने निर्णय गरेको हो।
लुम्बिनी विकास कोषका सदस्य सचिव एवं इञ्जिनियर दीपक श्रेष्ठले लुम्बिनीको पर्यटन प्रवर्द्धन र पर्यटक आगमन बढाउने उद्देश्यसहित अन्तर्राष्ट्रिय समुदायमा लुम्बिनीको प्रचार–प्रसारलाई नयाँ उचाइमा पुर्याउन वैशाख १६ र १७ गते सम्मेलन आयोजना गर्ने जानकारी दिए।
संस्कृति, पर्यटन तथा नागरिक उड्डयन मन्त्री तथा लुम्बिनी विकास कोषका अध्यक्ष अनिलकुमार सिन्हाको अध्यक्षतामा बसेको बैठकले सम्मेलनका लागि १० सदस्यीय मूल आयोजक समारोह समिति गठन गरेको छ। समितिको संयोजक लुम्बिनी विकास कोषका उपाध्यक्ष डा. ल्हारक्याल लामा (खेन्पो छिमेछिरिङ) रहनेछन्।
सरकारले चालु आर्थिक वर्षमा सम्मेलन आयोजना गर्न रु तीन करोड बजेट विनियोजन गरेको छ। यसअघि देशमा भएको राजनीतिक तथा संरचनात्मक कारणले नोभेम्बरमा आयोजना गर्न नसकिएको सम्मेलन २५७०औँ बुद्ध जयन्तीको अवसर पारेर वैशाख १६ र १७ गते लुम्बिनीमा गर्ने तयारी भएको सदस्य सचिव श्रेष्ठले जानकारी दिनुभयो।
सम्मेलनको उद्देश्य बुद्ध धर्म र दर्शनमार्फत विश्व शान्ति प्रवर्द्धन गर्दै दया, करुणा र विश्व बन्धुत्वको भावना फैलाउनु रहेको छ। सम्मेलनमा विश्वका ६० भन्दा बढी देशका बौद्ध विद्वान, गुरु, विशिष्ट पाहुना तथा विभिन्न क्षेत्रका महत्वपूर्ण व्यक्तित्वको सहभागिता रहने विश्वास व्यक्त गरिएको छ।
दुई दिनसम्म सञ्चालन हुने सम्मेलनमा बुद्ध जन्मस्थल लुम्बिनी, कपिलवस्तु र बुद्धसँग सम्बन्धित क्षेत्रको सम्पदा, लुम्बिनी क्षेत्रको पर्यावरणीय अवस्था, विश्व बौद्ध सम्पदा, बौद्ध शिक्षा र संस्कृतिका विषयमा छलफल र कार्यपत्र प्रस्तुत हुने जनाइएको छ।
यसअघि भएका पहिलो र दोस्रो अन्तर्राष्ट्रिय बौद्ध सम्मेलनले नेपालको धार्मिक, सांस्कृतिक र पर्यटन क्षेत्रमा महत्वपूर्ण योगदान पुर्याएको लुम्बिनी विकास कोषले जनाएको छ। यस पटकको सम्मेलनले लुम्बिनीलाई अन्तर्राष्ट्रिय स्तरमा चिनाउने, बौद्ध धर्मको महत्व बढाउने र पर्यटन प्रवर्द्धन गर्ने मुख्य उद्देश्य राखिएको सदस्य सचिव श्रेष्ठले बताए।
तपाईको प्रतिक्रिया
सम्बन्धित खवर
