सोलुखुम्बु :- नेपालि कांग्रेसका केन्द्रीय कार्यसम्पादन समिति सदस्य आङ्गेलु शेर्पा सोलुखुम्बुबाट सर्वाधिक मतका साथ महाधिवेशन प्रतिनिधिमा निर्वाचित भएका छन्। बिहीबार सोलुखुम्बुमा सम्पन्न पार्टीको आन्तरिक निर्वाचनमा खुला क्लस्टरतर्फ उम्मेदवारी दिएका शेर्पा ६ सय ८० मत प्राप्त गर्दै विजयी भएका हुन्। निर्वाचनमा कुल १ हजार ५६ मत खसेको थियो।
महाधिवेशन प्रतिनिधिमा सानदार जित दर्ता गरेसँगै नेता शेर्पाले नेपाली कांग्रेसको आगामी १५औँ महाधिवेशनमा महामन्त्री पदमा उम्मेदवारी दिने घोषणा समेत गरेका छन्। असोज १८ गतेदेखि सुरु हुन गइरहेको महाधिवेशनमा आफू महामन्त्री पदको बलियो दाबेदारका रूपमा प्रस्तुत हुन लागेको उनले जानकारी दिए।
आफ्नो उम्मेदवारीबारे प्रष्ट पार्दै नेता शेर्पाले भने, “नेपाली कांग्रेसको कार्यकारिणी अधिकार सभापति र महामन्त्रीमा निहित हुन्छ। त्यसैले पार्टीको नीति निर्माण तहमा महामन्त्रीहरूको भूमिका प्रमुख रहन्छ। नेतृत्व तहमा पुगेर पार्टीलाई थप गतिशील बनाउन र ठोस भूमिका खेल्नका लागि मैले महामन्त्रीमा उम्मेदवारी दिने निर्णय गरेको हुँ।”
उनले आसन्न महाधिवेशनमा सकेसम्म सहमति र सहकार्यकै आधारमा नयाँ केन्द्रीय कार्यसमिति चयन गर्ने प्रयास गरिने पनि बताए। शेर्पाको यो घोषणा र सोलुखुम्बुमा पाएको भारी मतले कांग्रेसको आन्तरिक राजनीति र आगामी महाधिवेशनको सरगर्मीलाई थप बढाएको छ।
तपाईको प्रतिक्रिया
सम्बन्धित खवर
