काठमाडौँ :- यही फागुन ३ गते देशभर श्रद्धा, भक्ति र उल्लासका साथ मनाइने महाशिवरात्रि पर्वलाई लक्षित गर्दै भक्तजनहरू पूर्वतयारीमा जुट्न थालेका छन्। शिवरात्रिको अवसरमा विशेषगरी रसुवा जिल्लामा अवस्थित पवित्र तीर्थस्थल गोसाइँकुण्डमा भक्तजनको आकर्षण उल्लेख्य रूपमा बढ्दै गएको छ।
समुद्री सतहदेखि करिब ४ हजार ३८० मिटर उचाइमा रहेको गोसाइँकुण्ड धार्मिक, सांस्कृतिक तथा प्राकृतिक दृष्टिले अत्यन्तै महत्वपूर्ण मानिन्छ। धार्मिक विश्वासअनुसार गोसाइँकुण्ड भगवान् शिव विराजमान रहनुभएको पवित्र कुण्ड हो। शिवरात्रिका दिन यहाँ स्नान, पूजा तथा आराधना गरेमा मनोकामना पूरा हुने जनविश्वास रहिआएको छ।
पौराणिक कथाअनुसार समुद्र मन्थनका क्रममा उत्पन्न भएको हलाहल नामक कालकूट विष भगवान् शिवले ग्रहण गरी सम्पूर्ण प्राणी जगतको रक्षा गर्नुभएको थियो। यही कारणले भगवान् शिवलाई ‘नीलकण्ठ’ भनिएको धार्मिक मान्यता छ। हिमवत्खण्डमा जीवनमा कम्तीमा एक पटक भए पनि गोसाइँकुण्डको दर्शन गर्नुपर्ने उल्लेख गरिएको छ, जसले यस तीर्थस्थलको धार्मिक महत्वलाई पुष्टि गर्दछ।
काठमाडौँबाट रसुवाको धुञ्चेसम्म सवारीसाधनमार्फत पुगेर त्यहाँबाट तिवारीबगर, खन्ति, डिम्सा, चन्दनबारी, चोलाङपाटी र लौरीविनायक हुँदै गोसाइँकुण्ड पुग्न सकिन्छ। धुञ्चेबाट उकालो यात्रा सुरु भएपछि लौरीविनायकभन्दा माथि लेक लाग्ने भएकाले चन्दनबारीमा एक रात विश्राम गरी यात्रा अगाडि बढाउँदा सहज हुने होटल व्यवसायी सुब्बा लामाले जानकारी दिनुभयो।
गोसाइँकुण्डमा जनैपूर्णिमा र कगंगा दशहराका अवसरमा विशेष मेला लाग्ने गर्दछ, जहाँ हजारौँ भक्तजन स्नानका लागि पुग्ने गर्छन्। ती अवसरमा भक्तजनको सुरक्षाका लागि विशेष सुरक्षा व्यवस्था गरिने रसुवाका प्रमुख जिल्ला अधिकारी राजेश पन्थीले बताउनुभयो।
२०७२ सालको भूकम्पपछिका वर्षहरूमा युवा पुस्ताको गोसाइँकुण्डप्रतिको आकर्षण बढ्दै गएको छ, जसले धार्मिक पर्यटनलाई निरन्तरता दिएको छ। शिवरात्रिको अवसरमा नीलाद्री पर्वत पुगेर भगवान् शिवको दर्शन गर्नुपर्ने रसुवाका पुरोहित टङ्कप्रसाद ढकालले सुझाव दिनुभयो।
यात्रालाई सहज बनाउन नमस्ते पासाङ ल्हामु यातायात प्रालिले आवश्यक सवारीसाधनको व्यवस्था गर्दै आएको छ। साना सवारीसाधन शिवपुरी, ढिकुरे र विदुर हुँदै धुञ्चे पुग्ने गरेका छन् भने ठूला सवारीसाधन माछापोखरी–नागढुङ्गा–गल्छी–त्रिशूली मार्ग प्रयोग गर्छन्। साथै, लौरीविनायकको उकालो यात्राका लागि हेलिकप्टर सेवासमेत उपलब्ध गराइएको सेवा सञ्चालकले बताएका छन्।
हाल गोसाइँकुण्डमा पानी जमेर बरफ बनेको अवस्था रहेकाले भक्तजनलाई विशेष सतर्कता अपनाउन आग्रह गरिएको छ। बरफमाथि हिँड्दा फुटेर कुण्डभित्र खस्ने जोखिम रहन्छ। रामसार सूचीमा सूचीकृत पवित्र तीर्थस्थल भएकाले यसको संरक्षण सबैको साझा दायित्व भएको गोसाइँकुण्ड गाउँपालिकाका अध्यक्ष कैसाङ नुर्पु तामाङले बताउनुभयो।
चिसो मौसमलाई मध्यनजर गर्दै तातो लुगा, कागती, अदुवा, सातु, सामल तथा आवश्यक औषधि साथमा लैजान उपयुक्त हुने बताइएको छ। साथै, कुण्डमा स्नान गर्दा भिजेको लुगा वा फोहर जथाभावी नफ्याँक्न, वन्यजन्तु तथा वनस्पतिको संरक्षण गर्न र धार्मिक आस्थाको सम्मान गर्दै श्रद्धापूर्वक दर्शन गर्न सबै भक्तजनलाई अनुरोध गरिएको छ।
तपाईको प्रतिक्रिया
