काठमाडौँ :- अस्पतालको आकस्मिक कक्षमा रातभर बिरामीको जीवन जोगाउन खटिने स्वास्थ्यकर्मीहरू प्रायः आफ्नै पीडा लुकाएर मुस्कुराइरहेका हुन्छन्। सेतो कोटभित्र लुकेको त्याग, थकान र संघर्षको कथा मंगलबार नेपाल मेडिकल कलेजको सभाहलमा मञ्चन गरिएको नाटकले सजीव रूपमा प्रस्तुत गरेको छ।
अन्तर्राष्ट्रिय नर्सिङ डेका अवसरमा नर्सिङ विभागद्वारा आयोजित कार्यक्रममा प्रस्तुत ‘सेतो कोटको पछाडिको पीडा’ नाटकले स्वास्थ्यकर्मीहरूको वास्तविक जीवन भोगाइलाई मञ्चमा उतारेपछि सभाहल भावुक बनेको थियो।
नाटकमा देखाइएका दृश्यहरू काल्पनिक नभई पछिल्लो समय स्वास्थ्य संस्थाहरूमा देखिने यथार्थ घटनामा आधारित थिए। एकातिर सन्तानलाई डाक्टर बनाउन जीवन समर्पण गर्ने आमाको कथा, अर्कोतिर आफ्नै बच्चालाई घरमा छाडेर बिरामीको सेवामा खटिने नर्सको संघर्षले दर्शकलाई गहिरो प्रभाव पारेको थियो।
कार्यक्रममा बिरामी बचाउन नसकिएको अवस्थामा स्वास्थ्यकर्मी नै दोषी ठहरिने अवस्था, साथै उनीहरूमाथि हुने दुर्व्यवहार र मानसिक दबाबलाई पनि मार्मिक रूपमा प्रस्तुत गरिएको थियो। यसले उपस्थित चिकित्सक, नर्स तथा विद्यार्थीहरूलाई आफ्नै जीवन अनुभवसँग जोडिएको महसुस गराएको थियो।
कार्यक्रमकी प्रमुख अतिथि तथा कलेजकी प्रबन्ध निर्देशक डा. सबिहा यासमिनले नाटकले स्वास्थ्यकर्मीहरूको वास्तविक पीडालाई यथार्थ रूपमा उजागर गरेको बताइन्। उनले कुनै पनि स्वास्थ्यकर्मीले बिरामीलाई हानि पुर्याउने उद्देश्य नराख्ने भन्दै उनीहरूको प्रयासलाई बुझ्नुपर्ने र सम्मानजनक वातावरण आवश्यक रहेको उल्लेख गरिन्।
त्यस्तै, कलेजकी निर्देशक डा. नुसरत जहाँ अन्सारीले नर्सहरूको योगदान अतुलनीय रहेको भन्दै उनीहरूको क्षमता विकास र पेशागत सुरक्षामा कलेज प्रतिबद्ध रहेको बताइन्। कार्यक्रममा प्रिन्सिपल प्रा.डा. मोदनाथ मरहठ्ठा, अस्पताल निर्देशक प्रा.डा. निलमणी उपाध्याय र मेट्रोन नविना सिंहले पनि स्वास्थ्यकर्मीको योगदानको प्रशंसा गरेका थिए।
नर्सिङ डेका अवसरमा चित्रकला, हाजिरीजवाफ, सरसफाइ तथा सचेतनामूलक कार्यक्रमहरू पनि आयोजना गरिएको थियो। विभिन्न प्रतियोगितामा उत्कृष्ट हुनेलाई सम्मान गरिएको थियो। कार्यक्रममा विद्यार्थीहरूले फ्लोरेन्स नाइटिङ्गेलको योगदान स्मरण गर्दै सेवा, त्याग र समर्पणको भावलाई निरन्तर अघि बढाउने प्रतिबद्धता जनाएका थिए।
तपाईको प्रतिक्रिया
सम्बन्धित खवर
