काठमाडौँ :- नेपाल उद्योग वाणिज्य महासंघ का अध्यक्ष चन्द्रप्रसाद ढकाल ले नेपालमा लगानीको अवसर अभाव छ भन्ने धारणा गलत रहेको बताएका छन्। उनका अनुसार देशमा सम्भावना प्रशस्तै भए पनि नकारात्मक सोचका कारण अवसर देख्न नसकिएको हो।
उनले नेपालमा लगानी, उद्यम र रोजगारीका धेरै सम्भावना रहेको उल्लेख गर्दै “यहाँ केही हुँदैन, गर्न सकिँदैन” भन्ने सोचसँग आफू कहिल्यै सहमत नभएको बताए। महासंघले महिला उद्यमी, युवा तथा स्टार्टअप र साना तथा मझौला व्यवसायलाई प्रोत्साहन गर्न विभिन्न इकाइहरू गठन गर्दै आएको उनले जानकारी दिए।
ढकालका अनुसार विदेशी लगानी आकर्षित गर्न विभिन्न देशका उद्यमीहरूसँग अन्तरक्रिया र छलफललाई तीव्र बनाइएको छ। साथै, लगानीमैत्री वातावरण निर्माणका लागि कानुनी तथा नीतिगत सुधारमा पनि महासंघले पहल गरिरहेको उनले बताए।
उनले महिला उद्यमशीलता र स्टार्टअप क्षेत्रमा उल्लेख्य वृद्धि भइरहेको उल्लेख गर्दै महासंघले ‘स्टार्टअप फोरम’मार्फत सरकार र उद्यमीबीच सहकार्य गर्दै आएको जानकारी दिए। स्टार्टअप नीतिको निर्माणमा पनि महासंघको पहल महत्वपूर्ण रहेको उनको भनाइ छ।
रोजगारी सिर्जना निजी क्षेत्रको प्रमुख प्राथमिकता रहेको बताउँदै उनले युवालाई स्वदेशमै अवसर दिन आवश्यक सीप र जनशक्ति विकासमा जोड दिएका छन्। यसका लागि बजारको मागअनुसार पाठ्यक्रम विकास र प्राविधिक तथा सीपमूलक शिक्षामा सरकारसँग सहकार्य गर्ने तयारी रहेको उनले बताएका छन्।
तपाईको प्रतिक्रिया
