काठमाडौँ :- रवि लामिछाने ले सुशासन र आर्थिक वृद्धिलाई सँगसँगै अघि बढाउने सरकारको नीति रहेको उल्लेख गर्दै केही अवस्थामा कडाइ आवश्यक हुन सक्ने बताएका छन्।
आज निजी क्षेत्रका प्रतिनिधिहरूसँगको अन्तरक्रियामा बोल्दै उनले सुशासन, आर्थिक सुधार, उत्पादनमुखी अर्थतन्त्र र निजी क्षेत्रको संरक्षण सरकारको प्राथमिकतामा रहेको बताए। उनले आफू धेरै बोल्नुभन्दा निजी क्षेत्रका समस्या र सुझाव सुन्न उपस्थित भएको उल्लेख गरे।
लामिछानेका अनुसार राष्ट्रिय स्वतन्त्र पार्टी ले आफ्नो वाचापत्रमार्फत अर्थतन्त्र सुधारका लागि स्पष्ट रोडम्याप अघि सारेको छ। उनले वास्तविक अर्थतन्त्र विकास, निजी क्षेत्रका समस्या समाधान र नागरिकको दैनिकीसँग जोडिएका विषयमा स्पष्ट योजना रहेको दाबी गरे।
उनले सरकारलाई वाचापत्रअनुसार चल्नुपर्ने बताए। निजी क्षेत्रलाई लक्षित गर्दै उनले भने, सरकार व्यवसायीलाई दुःख दिन नभई सहज वातावरण र प्रोत्साहन दिन चाहन्छ।
सुशासनका क्रममा केही असहज अवस्था आउन सक्ने उल्लेख गर्दै उनले त्यसको उद्देश्य प्रणाली सुधार भएको बताए। साथै, उनले रोजगारी सिर्जनामा निजी क्षेत्रको भूमिका निर्णायक हुने भन्दै सरकार र निजी क्षेत्रबीच सहकार्य अपरिहार्य रहेको धारणा राखे।
तपाईको प्रतिक्रिया
