काठमाडौँ :- अर्थमन्त्री डा. स्वर्णिम वाग्लेले शेयर बजारमा अनावश्यक त्रास फैलाइएको भन्दै सरकार साना लगानीकर्तालाई लक्षित गरेर कुनै धरपकड अभियानमा नरहेको स्पष्ट पारेका छन्।
नेपाल आर्थिक पत्रकार समाज (सेजन)सँग आज भएको छलफलमा उनले सरकारको शेयर बजारसम्बन्धी नीति स्पष्ट पार्दै लगानीकर्तालाई आतङ्कित बनाउने गतिविधि अनुचित भएको बताए। “सरकारले साना लगानीकर्तामाथि कारबाही गर्ने कुनै उद्देश्य राखेको छैन,” उनले भने।
उनका अनुसार नेपालमा शेयर बजार अन्य धेरै क्षेत्रभन्दा व्यवस्थित र पारदर्शी छ। पेपरलेस प्रणाली, बैंकमार्फत कारोबार, खातामा सिधै लाभांश जम्मा हुने व्यवस्था, स्पष्ट कर प्रणाली र खरिद–बिक्रीको ट्र्याकिङका कारण यो क्षेत्र विश्वसनीय रहेको उनले उल्लेख गरे। “स्टक मार्केटलाई हामीले डिजिटलाइजेसनको नमूना क्षेत्रका रूपमा लिएका छौँ,” उनले भने, “अन्य क्षेत्रमा पनि यही मोडेल विस्तार गर्ने लक्ष्य छ।”
अर्थमन्त्री वाग्लेले लगानीकर्तालाई ‘सम्पत्ति कहाँबाट ल्यायौँ’ भनेर सोध्ने अवस्था नरहेको दोहोर्याउँदै सरकारले धरपकडको नीति नलिएको बताए। तर इन्साइडर ट्रेडिङ, बजार हेरफेर वा अन्य अनैतिक गतिविधिमा संलग्नलाई भने विद्यमान कानुनअनुसार कारबाही हुने स्पष्ट पारे।
उनले लगानीकर्तालाई नआत्तिन आग्रह गर्दै बजार सुधारका लागि काम अघि बढाइने जानकारी दिए। नेप्से पुनःसंरचना प्रतिवेदन अध्ययन गरी आवश्यक सुधार लागू गरिने र नीतिगत रूपमा लगानीकर्तामैत्री दृष्टिकोण अपनाइने उनले बताए।
“अहिले बजार घटेको अवस्थामा अतालिनु आवश्यक छैन, सुनौला दिन आउँदैछन्,” उनले भने, “एक साताको उतारचढावलाई लिएर निष्कर्ष निकाल्नु उपयुक्त हुँदैन।”
उनले नेपाललाई वित्तीय कारबाही कार्यदल (एफएफिएफ) को ‘ग्रे लिस्ट’बाट बाहिर निकाल्नु सरकारको पहिलो प्राथमिकता रहेको बताए। ‘ग्रे लिस्ट’का कारण अन्तर्राष्ट्रिय छवि र लगानी वातावरणमा असर परेको उल्लेख गर्दै उनले सम्पत्ति शुद्धीकरण तथा वित्तीय अपराधसम्बन्धी अनुसन्धान प्रमाणका आधारमा अघि बढाइएको जानकारी दिए।
“कसैलाई छानेर दुःख दिने हाम्रो नियत होइन,” उनले भने, “हामी खुला बजार अर्थनीतिमा विश्वास गर्छौँ, तर त्यो छाडा अर्थतन्त्र होइन।” साथै कानुनअनुसार कसैलाई पनि उन्मुक्ति नदिइने तर निजी क्षेत्रलाई लक्षित गरेर धरपकड नगर्ने उनको भनाइ छ।
तपाईको प्रतिक्रिया
सम्बन्धित खवर
