काठमाडौँ :- कार्यवाहक प्रमुख निर्वाचन आयुक्त रामप्रसाद भण्डारीले विभिन्न जटिलता र व्यवधानका बाबजुद निर्वाचन आयोगले तोकिएकै मितिमा प्रतिनिधिसभा सदस्य निर्वाचन सफलतापूर्वक सम्पन्न गरेको बताउनुभएको छ।
आयोग परिसरमा आज आयोजित जलपान समारोहलाई सम्बोधन गर्दै उहाँले निर्वाचन घोषणा देखि परिणामसहितको प्रतिवेदन राष्ट्रपतिसमक्ष पेश गर्ने करिब छ महिनाको अवधिमा आयोगले चुनौतीपूर्ण परिस्थिति सामना गर्दै सम्पूर्ण प्रक्रिया सम्पन्न गरेको उल्लेख गर्नुभयो।
भण्डारीका अनुसार आयोगका कर्मचारीहरूको पेशागत दक्षता, विभिन्न निकाय तथा सरोकारवालासँगको समन्वय र सहकार्यका कारण मतदाता नामावली दर्ता, राजनीतिक दल दर्ता, अन्तिम मतदाता नामावली प्रकाशन, बन्दसूची पेश, निर्वाचन अधिकृत नियुक्ति, मतदाता शिक्षा, सामग्री व्यवस्थापन, मतदान तथा मतगणना लगायत सबै कार्य समयमै सम्पन्न गरियो।
उहाँले निर्वाचनअघि मतदाता नामावलीमा धेरै युवाहरू दर्ता हुन बाँकी रहेको उल्लेख गर्दै कानुनी व्यवस्था संशोधनका लागि अध्यादेश जारी गरी राष्ट्रिय परिचयपत्र प्रणालीसँग आबद्ध गर्दै अनलाइनमार्फत नाम दर्ता गर्ने व्यवस्था मिलाइएको जानकारी दिनुभयो।
निर्वाचनप्रति उठेका विभिन्न संशयबीच आयोगले राजनीतिक दल, सरकार र सरोकारवालासँग निरन्तर छलफल र परामर्श गर्दै उपयुक्त वातावरण तयार गरेको पनि उहाँले बताउनुभयो।
संविधानले दिएको जिम्मेवारीअनुसार जनताको सार्वभौम अधिकारको अभ्यास सुनिश्चित गर्दै लोकतन्त्र सुदृढीकरणमा योगदान पुर्याउन आयोग सफल भएको उहाँको भनाइ थियो।
उहाँले चुनौतीपूर्ण अवस्थाबीच पनि प्रतिनिधिसभा सदस्य निर्वाचन २०८२ शान्तिपूर्ण, स्वच्छ, निष्पक्ष र व्यवस्थित रूपमा सम्पन्न गरी समयमै राष्ट्रपतिसमक्ष प्रतिवेदन पेश गर्न सकेकोमा आयोग परिवार गौरवान्वित भएको बताउनुभयो।
उक्त समारोहमा राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानमन्त्री सुशीला कार्की, प्रधानन्यायाधीश प्रकाशमान सिंह राउत लगायत उच्च पदस्थ अधिकारी, कूटनीतिक नियोगका प्रतिनिधि तथा अन्य सरोकारवालाको उपस्थिति रहेको थियो।
कार्यक्रममा आयोगका सहसचिव तथा प्रवक्ता नारायणप्रसाद भट्टराईले भदौ २३ र २४ मा भएको युवा आन्दोलनपछि सिर्जित नयाँ राजनीतिक परिवेशमा आयोगले निष्पक्ष, स्वतन्त्र र भयरहित निर्वाचन सम्पन्न गराउन सफल भएको जानकारी दिनुभयो।
तपाईको प्रतिक्रिया
