काठमाडौँ :- गत भदौ २३ र २४ मा भएको जेनजी प्रदर्शनबारे जाँचबुझ आयोगले तयार पारेको प्रतिवेदन सार्वजनिक हुनुअघि नै ‘लिक’ भएको छ।
घटनाबारे करिब पाँच महिना अध्ययन तथा अनुसन्धानपछि आयोगले फागुन २४ गते प्रधानमन्त्री सुशीला कार्कीलाई प्रतिवेदन बुझाएको थियो। तर, सरकारले अहिलेसम्म उक्त प्रतिवेदन आधिकारिक रूपमा सार्वजनिक गरेको छैन।
यद्यपि सञ्चार माध्यममार्फत प्रतिवेदनका विवरणहरू बाहिरिएका छन्। जेनजीका अगुवाहरूले प्रतिवेदन सार्वजनिक गर्न माग गर्दै आएका छन्। यसबीच गृहमन्त्री ओमप्रकाश अर्यालले प्रतिवेदन सरकारले औपचारिक रूपमा सार्वजनिक नगरेको स्पष्ट पारेका छन्।
सञ्चारमाध्यममा सार्वजनिक भएको प्रतिवेदनको आधिकारिकताबारे आफू निश्चित हुन नसक्ने बताउँदै मन्त्री अर्यालले भने, “हामीले अध्ययन गर्दागर्दै आयो।”
करिब ८९८ पृष्ठ लामो उक्त प्रतिवेदनमा आयोगका निष्कर्ष, ठहर, सिफारिस तथा विभिन्न बयानहरू समेटिएका छन्। मन्त्रिपरिषद्ले प्रतिवेदन अध्ययन गर्ने निर्णय गरिसकेको र हाल सोही प्रक्रियामा रहेको गृहमन्त्री अर्यालले जानकारी दिए।
डिजिटल भर्सनबारे प्रश्न उठाउँदै मन्त्री अर्यालले सरकारले हालसम्म त्यसको इलेक्ट्रोनिक प्रति नै नपाएको दाबी गरे। उनका अनुसार आयोगले सरकारलाई लिखित (हार्ड कपी) प्रतिवेदन मात्र बुझाएको हो।
तपाईको प्रतिक्रिया
