काठमाडौँ :- फागुन २१ गते सम्पन्न प्रतिनिधिसभा सदस्य निर्वाचनको मतगणना अन्तिम चरणमा पुगेको छ।
निर्वाचन आयोगले अन्तिम मतपरिणाम सार्वजनिक गरेलगत्तै प्रतिनिधिसभाको बैठक बोलाउने तयारी सुरु गरिएको सङ्घीय संसद् सचिवालयले जनाएको छ। नेपालको संविधानको धारा ९३ अनुसार प्रतिनिधिसभा निर्वाचनको अन्तिम परिणाम घोषणा भएको मितिले ३० दिनभित्र राष्ट्रपतिले सङ्घीय संसद्को अधिवेशन आह्वान गर्नुपर्ने व्यवस्था छ।
यद्यपि विगतको अभ्यासअनुसार संसद् बैठक आह्वान गर्न एक वा दुई हप्ताभन्दा ढिला नहुने सचिवालयका प्रवक्ता एकराम गिरीले जानकारी दिए। उनका अनुसार सचिवालयले नवनिर्वाचित सांसदहरूलाई काठमाडौँ आउन करिब १० दिनको समय दिएर संसद् बैठकका लागि सूचना जारी गर्नेछ। सोही अवधिमा ज्येष्ठ सदस्यले राष्ट्रपतिबाट शपथ लिई अन्य सांसदहरूलाई शपथ गराउनेछन्।
सभामुखको निर्वाचन नभएसम्म ज्येष्ठ सदस्यले सभामुखको जिम्मेवारी निर्वाह गर्ने कानुनी व्यवस्था रहेको पनि उनले बताए। संसद्को पहिलो बैठकले सभामुखको निर्वाचनको मिति घोषणा गर्नेछ भने सभामुख अनुपस्थित हुँदा भूमिका निर्वाह गर्न प्रत्येक दलबाट तीन–तीन जनाको नाम अनुमोदन गरिनेछ। त्यसपछि बस्ने बैठकमा अध्यादेश भए पेस गरिनेछ।
यसैबीच निर्माणाधीन संसद् भवन समयमै सम्पन्न नभएकाले प्रतिनिधिसभाको बैठक केही समयका लागि अर्को प्रयोजनका लागि बनाइएको हलमा बस्ने तयारी भइरहेको सचिवालयले जनाएको छ।
सहरी विकास मन्त्रालय र निर्माण कम्पनी टुण्डी सेक ज्वाइन्ट भेञ्चरबीच विसं २०७६ असोज १६ गते भएको सम्झौताअनुसार सङ्घीय संसद् भवन तीन वर्षभित्र अर्थात् २०७९ असोज १५ गतेसम्म निर्माण सम्पन्न हुनुपर्ने थियो। तर कोरोना महामारीलगायत विभिन्न कारणले हालसम्म भवन निर्माण पूरा हुन सकेको छैन।
एक सय ५१ रोपनी क्षेत्रफलमा निर्माण भइरहेको परियोजनाअन्तर्गत प्रतिनिधिसभा भवन, राष्ट्रियसभा भवन, अतिविशिष्ट कक्ष र अन्य कार्यालयसहित १२ वटा भवन रहनेछन्। मुख्य भवनभित्र ३५० सिट क्षमताको संयुक्त लबी, १० वटा संसदीय दलका कार्यालय, चार विशिष्ट कक्ष, दुई संसद् सचिवालय भवन, संसद् लाइब्रेरी, दुई क्यान्टिन र ३९० गाडी अट्ने पार्किङ व्यवस्था रहनेछ।
तपाईको प्रतिक्रिया
सम्बन्धित खवर
