काठमाडौँ :- सहकारी रजिष्ट्रारको कार्यालय, गण्डकी प्रदेश पोखराले गण्डकी प्रदेशमा लामो समयदेखि निष्क्रिय रहेका ३५ वटा सहकारी संस्थाको दर्ता खारेज गरेको छ ।
कार्यालयका अनुसार यही माघ ९ गतेको निर्णयअनुसार स्याङ्जा, पर्वत र नवलपुरका नौवटा सहकारी संस्थाको दर्ता खारेजी गरिएको हो । यसअघि नै २६ वटा सहकारी खारेज भइसकेको र यससँगै खारेज हुने सहकारीको संख्या ३५ पुगेको रजिष्ट्रार कार्यालयले जनाएको छ ।
गण्डकी प्रदेश सहकारी ऐन, २०७५ को दफा ७१ उपदफा (३) अनुसार लगातार दुई वर्षसम्म कुनै पनि आर्थिक कारोबार नगरी निष्क्रिय रहेका सहकारी संस्थालाई खारेज गरिएको हो । यससम्बन्धी जानकारी कार्यालयले माघ १० गते सार्वजनिक सूचना जारी गर्दै दिएको छ ।
रजिष्ट्रार कार्यालयका अनुसार गत असार १५ गते ३५ दिने सार्वजनिक सूचना जारी गरी सहकारी संस्थालाई अद्यावधिक हुन आह्वान गरिएको थियो । तर तोकिएको अवधिमा विवरण तथा प्रतिवेदन पेस नगरेका सहकारीमध्ये यसपटक नौवटाको दर्ता खारेजी गरिएको र केही सहकारी खारेजीको प्रक्रियामा रहेको सहकारी रजिष्ट्रार भेषराज रिजालले जानकारी दिनुभयो ।
उहाँका अनुसार बागलुङ जिल्लामा पनि लामो समयदेखि निष्क्रिय रहेका र अद्यावधिकमा नआएका सहकारी संस्थालाई खारेज गर्ने तयारी भइरहेको छ । निष्क्रिय सहकारीको कुनै दायित्व बाँकी रहेमा त्यसको जिम्मेवारी सम्बन्धित सञ्चालक तथा पदाधिकारीको हुने व्यवस्था अनुसार प्रक्रिया अघि बढाइएको हो ।
रजिष्ट्रार कार्यालयको तथ्याङ्कअनुसार हालसम्म खारेज भएका सहकारीमध्ये स्याङ्जाका १२, गोरखाका ६, पर्वतका ५, तनहुँका ४, कास्कीका ३, म्याग्दीका २ तथा लमजुङ, बागलुङ र नवलपुरका १–१ वटा सहकारी संस्था रहेका छन् ।
रजिष्ट्रार कार्यालयले खारेज भएका सहकारी संस्थाको तिर्न बाँकी दायित्व भएमा सम्बन्धित सञ्चालक तथा जिम्मेवार पदाधिकारीले तिर्न बुझाउनुपर्ने स्पष्ट गरेको छ ।
माघ ९ गतेको निर्णयअनुसार खारेज हुने सहकारीमा स्याङ्जाको वालिङ नगरपालिका र चापाकोटा गाउँपालिकामा रहेका चार कृषि सहकारी, पर्वतको कुश्मा नगरपालिकामा रहेका चार दुग्ध तथा कफी सहकारी र नवलपरासी (बर्दघाट सुस्ता पूर्व) को हुप्सेकोट गाउँपालिकास्थित एक सहकारी संस्था रहेका छन् ।
तपाईको प्रतिक्रिया
सम्बन्धित खवर
