काठमाडौँ :- राष्ट्रिय स्वतन्त्र पार्टी (रास्वपा) की सांसद निशा डाँगीले नेपालमा लागूऔषध प्रयोग पाँच वर्षभित्र शून्य बनाउन सरकारसँग माग गरेकी छन्।
मंगलबार प्रतिनिधिसभाको शून्य समयमा बोल्दै उनले निर्वाचन क्षेत्रमा जाँदा धेरै अभिभावकहरूले आफ्ना छोराछोरी लागूऔषधको जोखिममा परेको भन्दै चिन्ता व्यक्त गरेको बताइन्।
डाँगीले झापा–१ मात्र नभई सीमा क्षेत्रका धेरै ठाउँमा यस्ता समस्या देखिने गरेको उल्लेख गर्दै लागूऔषधको प्रयोग र ओसारपसार राष्ट्रिय समस्या बनेको बताइन्। उनले लागूऔषध नियन्त्रण ब्युरोका अनुसार देशभर करिब १ लाख ५० हजारभन्दा बढी प्रयोगकर्ता रहेको तथ्य पनि प्रस्तुत गरिन्।
सीमा क्षेत्रलाई विशेष रूपमा संवेदनशील भन्दै उनले सरकारलाई लक्षित कार्यक्रम सञ्चालन गर्न आग्रह गरिन्। उनले भनिन्, “यो पाँच वर्षमा ‘से नो टु ड्रग्स’ जस्ता अभियान चलाएर लागूऔषध प्रयोग शून्य बनाउनुपर्छ।”
तपाईको प्रतिक्रिया
