काठमाडौं :- जनक शिक्षा सामग्री केन्द्र लिमिटेड, सानोठिमीले आगामी फागुन २१ गते हुने प्रतिनिधिसभा निर्वाचनका लागि दैनिक करिब १३ लाख मतपत्र छपाइ गरिरहेको छ।
केन्द्रका प्रबन्ध निर्देशक यदुनाथ पौडेलका अनुसार प्रत्यक्षतर्फ कुल दुई करोड तीन लाखभन्दा बढी मतपत्र छपाइ गर्नुपर्नेमा बिहीबार साँझसम्म करिब ८० लाख थान मतपत्र छपाइ सम्पन्न भइसकेको छ। उनले हाल दैनिक १३ लाखसम्म मतपत्र छपाइ भइरहेको र अबको एक साताभित्र सम्पूर्ण मतपत्र छपाइ गरी प्याकिङको काम सम्पन्न गरिने जानकारी दिए।
प्रबन्ध निर्देशक पौडेलले केन्द्रले छपाइ गरेको १० लाख नमूना मतपत्र निर्वाचन आयोगले विभिन्न स्थानमा पठाइसकेको बताए। साथै, समानुपातिकतर्फ दुई करोड आठ लाख ३० हजारभन्दा बढी मतपत्र छपाइ तथा प्याकिङको काम सम्पन्न भइसकेको उनले जानकारी दिए। प्रत्यक्षतर्फको मतपत्र छपाइ भने यसै महिनाभित्र सकिने उनले बताए।
उनका अनुसार समानुपातिकतर्फको मतपत्र माघ २५/२६ गतेदेखि ढुवानी सुरु गरिनेछ भने महिनाको अन्त्यसम्म प्रत्यक्षतर्फको मतपत्र छपाइ सकेर फागुन १/२ गतेसम्म सबै सामग्री जिल्लामा पठाइसक्ने तयारी गरिएको छ।
हाल प्रतिनिधिसभा सदस्य निर्वाचनको प्रत्यक्षतर्फ ६० निर्वाचन क्षेत्रका लागि करिब ८० लाख मतपत्र छपाइ सम्पन्न भएको छ। “समानुपातिकतर्फ दुई करोड आठ लाख ५४ हजार ८०० प्रति मतपत्र छपाइ गरी माघ १२ गतेदेखि प्रत्यक्षतर्फ दुई करोड तीन लाख २३ हजार मतपत्र छपाइ सुरु गरिएको हो,” पौडेलले भने, “आगामी फागुन ३ गतेभित्र सबै निर्वाचन क्षेत्रमा मतपत्र पठाइसक्ने निर्वाचन आयोगको योजनाअनुसार केन्द्रले काम गरिरहेको छ।”
निर्वाचन आयोगले निर्वाचनका लागि आवश्यक ३७ प्रकारका सामग्री सम्बन्धित जिल्ला निर्वाचन कार्यालयले नै खरिद गर्ने व्यवस्था गरेको पनि जनाइएको छ।
तपाईको प्रतिक्रिया
सम्बन्धित खवर
