काठमाडौँ :- निर्वाचन आयोगले आजदेखि निर्वाचन आचारसंहिता, २०८२ लागू गरेको छ। आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै आयोगले आचारसंहिता कार्यान्वयनमा ल्याएको हो। निर्वाचनलाई स्वच्छ, स्वतन्त्र, निष्पक्ष, पारदर्शी तथा भयमुक्त वातावरणमा सम्पन्न गर्न आचारसंहिता स्वीकृत गरी लागू गरिएको आयोगले जनाएको छ। आचारसंहिता नेपाल राजपत्रमा प्रकाशित भइसकेको छ।
आयोगबाट अर्को सूचना जारी नभएसम्म विभिन्न निकाय र तिनमा कार्यरत व्यक्तिलाई आचारसंहिता लागू हुने जनाइएको छ। आयोगका अनुसार नेपाल सरकार तथा मन्त्रीहरू, प्रदेश सरकार तथा मन्त्रीहरू, संवैधानिक निकाय र तिनका पदाधिकारी तथा नेपाल सरकार वा प्रदेश सरकारअन्तर्गतका निकाय र पदाधिकारी आचारसंहिताको दायरामा पर्नेछन्।
यसैगरी स्थानीय कार्यपालिका र तिनका सदस्य, संघ, प्रदेश र स्थानीय तहका कर्मचारी, सुरक्षा निकाय तथा सुरक्षाकर्मी, सरकारी, अर्धसरकारी तथा सार्वजनिक संस्थाका कार्यालय र कर्मचारी, राजनीतिक दल तथा तिनका भातृ संगठनलाई पनि आचारसंहिता लागू हुनेछ।
उम्मेदवार, राजनीतिक दल तथा उम्मेदवारका निर्वाचन प्रतिनिधि, मतदान र मतगणना प्रतिनिधि, सार्वजनिक पद धारण गरेका व्यक्ति, अनुगमन समितिका पदाधिकारी तथा अनुगमनकर्तालाई समेत आचारसंहिता लाग्ने आयोगले जनाएको छ।
पर्यवेक्षण संस्था तथा पर्यवेक्षक, सञ्चार प्रतिष्ठान, सञ्चारकर्मी, निजी तथा गैरसरकारी संस्था, शैक्षिक संस्था र तिनका शिक्षक तथा कर्मचारी पनि आचारसंहिताको दायरामा परेका छन्।
त्यसैगरी मतदाता, विकास साझेदार संस्था, सरकारी तथा अर्धसरकारी निकायबाट सञ्चालित परियोजना र तिनका कर्मचारी, मतदाता शिक्षा कार्यक्रम सञ्चालन गर्ने संस्था तथा कर्मचारीलाई पूर्ण रूपमा आचारसंहिता लागू हुनेछ।
निजी क्षेत्रका बैंक तथा वित्तीय संस्था, सहकारी, व्यापारिक तथा औद्योगिक क्षेत्र, वस्तु तथा सेवा प्रदायक संस्था तथा तिनका पदाधिकारी, कर्मचारी र कामदार तथा आयोगले तोकेका अन्य निकाय वा व्यक्तिलाई पनि आचारसंहिता लागू हुने आयोगले स्पष्ट गरेको छ।
आचारसंहिताको पूर्ण कार्यान्वयन र पालना गर्न सबै पक्षको सहयोग आवश्यक रहेको आयोगका प्रवक्ता नारायणप्रसाद भट्टराईले जानकारी दिएका छन्।
तपाईको प्रतिक्रिया
