काठमाडौँ :- नेकपा (एमाले) का अध्यक्ष केपी शर्मा ओलीले नेपालमा नेपालीकै सरकार बनाउने आफ्नो पार्टीको अडान दोहोर्याउँदै अरूको सरकार बनेमा सङ्घर्ष गरेर ढाल्ने चेतावनी दिनुभएको छ । ४२ औँ पिस्कर सहिद स्मृति दिवस तथा सरेश नेपालद्वारा लिखित ‘जेलभित्रका सङ्घर्ष’ पुस्तकको विमोचन कार्यक्रममा सम्बोधन गर्दै पूर्वप्रधानमन्त्री ओलीले नेपाली जनताकै सरकार र समृद्धि एमालेकै नेतृत्वमा हुनुपर्छ भन्ने अभियानमा पार्टी निरन्तर लागिरहेको स्पष्ट गर्नुभयो ।
अध्यक्ष ओलीले नेपाली सरकार चाहनेहरूका घर र पार्टी कार्यालयमा आगजनी गरिएको, कार्यपालिका, न्यायपालिका, राष्ट्रिय संरचना तथा उद्योगहरूमा आक्रमण भएको उल्लेख गर्दै मुलुकमा थिति र विधिको शासन कमजोर भएको टिप्पणी गर्नुभयो । उहाँले अहिले जथाभावी शासन चलिरहेको र अपराध गर्नेहरूलाई चुनावी प्रयोजनका लागि ‘हिरो’ बनाउने प्रवृत्ति बढेको आरोप लगाउनुभयो ।
“हामी नेपालमा नेपालको सरकार बनाउन चाहन्छौँ । अरूको सरकार बनाउन दिँदैनौँ, बन्यो भने ढाल्छौँ,” उहाँले भन्नुभयो, “यो देश पुर्खाले लडेर स्वतन्त्र र सार्वभौम बनाएको हो, यसलाई जोगाउनु सबैको दायित्व हो ।”
अध्यक्ष ओलीले राष्ट्रिय स्वतन्त्र पार्टीका सभापति रवि लामिछानेसम्बन्धी सङ्गठित अपराध र सम्पत्ति शुद्धीकरणका मुद्दा फिर्ता लिने महान्याधिवक्ताको कार्यालयको निर्णयप्रति आपत्ति जनाउँदै त्यसलाई इतिहासकै लागि लज्जास्पद विषय भएको टिप्पणी गर्नुभयो । “जनताको हिनामिना भएको पैसा कसले तिर्छ ? के महान्याधिवक्ताको कार्यालयले तिर्छ ?” भन्दै उहाँले प्रश्न गर्नुभयो ।
एमाले इतिहासदेखि नै राष्ट्रिय स्वाधीनता र समृद्धिका लागि सङ्घर्ष गर्दै आएको उल्लेख गर्दै अध्यक्ष ओलीले फेरि पनि निर्भयताका साथ अघि बढ्न कार्यकर्तालाई आग्रह गर्नुभयो ।
निरङ्कुश पञ्चायत सरकारले २०४० साल पुस ३० गते सिन्धुपाल्चोकको पिस्करमा हत्या काण्ड गराएको घटना स्मरण गर्दै उहाँले सहिदको बलिदान र परिवर्तनकारी जनताको आदर्शप्रति कर्तव्यनिष्ठ भएर अघि बढ्नुको विकल्प नभएको बताउनुभयो ।
तपाईको प्रतिक्रिया
सम्बन्धित खवर
