काठमाडौँ :- जिल्ला प्रशासन कार्यालय लमजुङमा राहदानी सेवा प्रभावित भएसँगै सेवाग्राहि आउन छाडेका छन् । समयमै राहदानी छपाई नहुने भएपछि उक्त सेवा लिनका लागि सेवाग्राहिनै आउन छोडेका हुन् ।
राहदानी विभागले आगामी फागुनसम्म अत्यावश्यक बाहेक नयाँ राहदानी तथा नविकरण गरीएका राहदानी समयमै छपाई गर्न नसक्ने भएपछि जिल्ला प्रशासन कार्यालय लमजुङमा पनि सेवा प्रभावित भएको हो ।
राहदानी विभागले विद्युतीय राहदानी आपुर्तिका लागि नयाँ आपुर्तिकर्तासँग सम्झौता गरेको र जिम्मेबारी हस्तान्तरणको संक्रमणकालिन अवस्था सिर्जना भएको भन्दै तत्कालका लागि अत्यावश्यक बाहेक नयाँ राहदानी उपलब्ध गराउन नसकिने सूचना प्रवाह गरेको थियो । सोहि अनुसार जिल्लामा राहदानीका लागि आवेदन दिएपनि फागुनसम्म राहदानी हात नपर्ने भएपछि प्रशासन कार्यालयमा सेवाग्राहिनै आउन छाडेका हुन् ।
राहदानी विभागले नयाँ आपुर्तिकर्तासँग राहदानी पुस्तिका छपाईका लागि आगामी फागुन महिनाबाट सेवा शुरु गर्नेगरी गत श्रावण महिनामै सम्झौता गरेको थियो । त्यस विचमा संक्रमणकालिन अवस्था भएकोले अत्यावश्यक बाहेक साधरण सेवा दिन नसकिने विभागले जनाएको छ ।
विभागबाटै राहदानी सेवा प्रभावित भएपछि जिल्लाबाट पनि सेवा दिन नसकिएको जिल्ला प्रशासन कार्यालय लमजुङका सहायक प्रमूख जिल्ला अधिकारी थमनसिँह गौतमले बताए । हाल राहदानी बनाउन कोहि सेवाग्राहि आएमा उनिहरुको आवश्यकताको महत्वलाई आधार मानेर सेवा दिईरहेको सहायक प्रजिअ गौतमको भनाई छ ।
‘थोरै मात्रामा सेवाग्राहि आउछन्, कहिले सम्म चाहिन्छ भनेर सोध्ने गरेका छौँ’ सहायक प्रजिअ गौतमले भने ‘तत्कालै आवश्यक परेमा काठमाण्डौ पठाउछौँ, तर समय छ भनेमात्रै आवेदन दर्ता गर्ने गरेका छौँ ।’
राहदानी तत्काल आवश्यक पर्ने भएमा काठमाण्डौ पठाईएको तर फुर्सदमा आवेदन दिने र फागुनसम्म पनि राहदानी पुस्तिका आवश्यक नपर्ने भएमा मात्रै जिल्लाबाट आवेदन सेवा दिईहेको सहायक प्रजिअ गौतमको भनाई छ ।
जिल्लाबाट नयाँ राहदानी तथा पुरानो राहदानी नविकरण सेवा प्रभावित भएसँगै जिल्ला प्रशासन कार्यालय लमजुङले तीन महिना अघि आवेदन दिएका राहदानी सेवा पनि वितरण गर्न नसकिएको जनाएको छ । गत श्रावण महिनाबाटनै राहदानी छपाई सेवा अवरुद्ध भएकोले गत भदौदेखिनै अवेदन दिएका राहदानी छपाई नभएको र वितरण नगरिएको जिल्ला प्रशासन कार्यालय लमजुङले जनाएको छ ।
यद्यपी जिल्ला प्रशासन कार्यालय लमजुङले चालु आर्थिक वर्षको पहिलो त्रैमासिकमा मात्रै भने एकहजार तीनसय १५ थान राहदानी वितरण गरीसकेको छ । श्रावण महिना अघिनै आवेदन दिएका र छपाई भएर आएका राहदानी मात्रै प्रशासन कार्यालयबाट वितरण भएको हो ।
सोहि अवधीमा प्रशासन कार्यालयमा एकहजार पाँचसय ४७ जनाले राहदानीका लागि आवेदन दिएका छन् । त्यो मध्ये अधिकांशको राहदानी छपाई हुन नसक्दा वितरण पनि रोकिएको छ । पहिलो त्रैमासिक पछि पनि जिल्ला प्रशासन कार्यालयबाट राहदानी आवेदन दर्ता भईरहेकोमा ति सवै छपाईकै प्रक्रियामा रहेको प्रशासन कार्यालयले जनाएको छ ।
तपाईको प्रतिक्रिया
