काठमाडौँ :- गत भदौ २३ र २४ गते ‘जेनजी’ प्रदर्शनका क्रममा सार्वजनिक सम्पत्ति, भौतिक संरचना तथा निजी प्रतिष्ठानमा भएको क्षतिको मूल्याङ्कन र पुनःनिर्माण योजना तयारीका लागि राष्ट्रिय योजना आयोगले देशभर ४४ जिल्लामा ३८ टोली परिचालन गरेको छ।
राष्ट्रिय योजना आयोगका सहायक प्रवक्ता डा. दिवाकर लुइँटेलका अनुसार टोलीहरूलाई आगामी हप्ताभित्र क्षतिको सम्पूर्ण विवरण सङ्कलन गर्ने लक्ष्यसहित खटाइएको हो। तथ्याङ्क सङ्कलनमा एकरूपता ल्याउन आयोगले ‘क्षति मूल्याङ्कन सर्वेक्षण पोर्टल’ सञ्चालन गरेको छ, जसमा स्थानीय तह, प्रदेश र सङ्घका सम्बन्धित निकायहरूले अनलाइनमार्फत विवरण पेस गर्नुपर्ने व्यवस्था गरिएको छ।
लुइँटेलका अनुसार प्रदर्शनका क्रममा क्षति पुगेका ४४ जिल्लाभित्रका करिब २६० पालिका, सबै प्रदेश र सङ्घीय निकायहरूलाई ‘युजरनेम’ र ‘पासवर्ड’ प्रदान गरिएको छ। सङ्कलित विवरण उक्त पोर्टलमार्फत अद्यावधिक गरिनेछ।
आयोगले सहजीकरणका लागि प्राविधिक जनशक्तिसहितको टोली पनि पठाएको छ। आइतबारसम्म सबै टोली कार्यस्थलमा पुगिसक्ने र एक हप्ताभित्र तथ्याङ्क सङ्कलन सम्पन्न हुने अपेक्षा गरिएको छ।
यसअघि असोज ५ गतेको मन्त्रिपरिषद् बैठकले क्षति मूल्याङ्कन तथा पुनःनिर्माण योजना तयार गर्न राष्ट्रिय योजना आयोगका सचिवको संयोजकत्वमा पाँच सदस्यीय समिति गठन गरेको थियो। सो समितिलाई कार्यान्वयनका लागि आयोगका सहसचिवको संयोजकत्वमा सहजीकरण उपसमिति र सचिवालय गठन गरिएको छ।
आयोगका अनुसार उपसचिवको नेतृत्वमा ४१ जिल्लामा ३४ टोली र उपत्यकाका तीन जिल्लामा चार टोली गरी कुल ३८ टोली परिचालन भएका छन्। साथै, सहसचिवको नेतृत्वमा सबै प्रदेश र उपत्यकाका लागि ११ वटा सुपरीवेक्षण टोली पनि खटाइएको छ।
तपाईको प्रतिक्रिया
सम्बन्धित खवर
