मकवानपुर :- मकवानपुरको हेटौंडा उपमहानगरपालिका–६ स्थित गौरीटार अन्तर्राष्ट्रिय रंगशालामा खेल पूर्वाधार निर्माणले नयाँ गति लिएको छ। लामो समयदेखि अलपत्र रहेको यस परियोजनालाई बागमती प्रदेश सरकारले ‘गौरवको आयोजना’का रूपमा समेटेपछि काम तीव्र गतिमा अघि बढेको हो।
हाल रंगशालाभित्र अन्तर्राष्ट्रिय स्तरका पौडी पोखरी र क्रिकेट मैदान निर्माण सम्पन्न भएका छन्, जबकि फुटबल मैदान पहिले नै तयार भइसकेको छ।
सन् २०८१ वैशाखमा शिलान्यास गरिएको पौडी पोखरी र क्रिकेट मैदान दुवै संरचना २०८२ असार मसान्तभित्र सम्पन्न गर्ने लक्ष्य राखिएको थियो। ८ करोड ६३ लाख रुपैयाँ लागतमा बनेको पौडी पोखरीमा २५×५० मिटर र २५×१० मिटर आकारका दुई पोखरी निर्माण गरिएका छन्। ठूलो पोखरीमा एकैपटक १० जना खेलाडीले प्रतिस्पर्धा गर्न सक्ने सुविधा छ भने १ सय ५० दर्शक क्षमताको भिआइपी प्यारापिट पनि तयार गरिएको छ।
त्यसैगरी, ११ करोड ७४ लाख रुपैयाँमा निर्मित क्रिकेट मैदानमा ५ वटा पिच, स्कोरबोर्ड, ड्रेनेज प्रणाली तथा ४ सय ५० दर्शक क्षमताको प्यारापिट निर्माण गरिएको छ। पहिलो चरणमा करिब १३ करोड रुपैयाँमा सम्पन्न यो मैदानमा प्याभिलियन निर्माणको काम बाँकी रहेको छ। प्याभिलियन बनेपछि अन्तर्राष्ट्रियस्तरका प्रतियोगिता आयोजना गर्न सकिने बागमती प्रदेश खेलकुद विकास परिषद्का सदस्यसचिव दीपक लामाले जानकारी दिनुभयो।
उहाँका अनुसार छठ पर्वपछि पौडी पोखरी र क्रिकेट मैदानको औपचारिक उद्घाटन प्रतियोगितासहित गर्ने तयारी भइरहेको छ। यसअघि नै तयार भइसकेको फुटबल मैदानमा राष्ट्रिय स्तरका प्रतियोगिता सम्पन्न भइसकेका छन्। सो मैदानमा २ हजार ८ सय ५० दर्शक क्षमताको प्यारापिट, खेलाडी चेन्जिङ रुम तथा अन्य संरचना तयार भएका छन् भने सेन्थेटिक ट्रयाक र फ्लड लाइट निर्माणको काम बाँकी छ।
रंगशालाभित्र अन्य खेल संरचनाहरू पनि क्रमशः निर्माण भइरहेका छन्। फुटबल अभ्यास मैदान र टेनिस कोर्टमा तारजाली लगाउने काम जारी छ। करिब २ अर्ब ३२ करोड रुपैयाँ लागतको विस्तृत परियोजना प्रतिवेदन (डीपीआर) अनुसार रंगशालाभित्र फुटबल, क्रिकेट, पौडी, तेक्वान्दो, कराँते, बक्सिङ, बास्केटबल र लन टेनिससहित २१ खेल पूर्वाधार, प्रशासनिक भवन र खेलाडी छात्रावास निर्माणको योजना रहेको छ। हालसम्म करिब ३२ करोड रुपैयाँ बराबरका संरचना निर्माण भइसकेका छन्।
२३ विगाह क्षेत्रफलमा फैलिएको रंगशाला परिसरमा मास्टरप्लानअनुसार ६ हजार दर्शक क्षमताको इनडोर कर्भड हल, भिआइपी कक्ष, खेलाडी कक्ष, चेन्जिङ रुम, ब्रोडकास्टिङ र मिडिया कक्षसमेत निर्माण गरिनेछ।
उक्त रंगशालाको शिलान्यास २०६६ जेठमा तत्कालीन प्रधानमन्त्री माधवकुमार नेपालले गर्नुभएको थियो। २०७६ सालमा बागमती प्रदेश सरकारले स्वामित्व लिएपछि निर्माणले स्थायी गति पाएको हो।
तपाईको प्रतिक्रिया
