पर्वत :- पर्वत जिल्लाको महाशिला गाउँपालिकामा निर्माणाधीन लुंखुदेउराली–मिलनचोक–बालाकोट–होश्राङदी सडक आयोजना पाँच वर्षसम्म पनि सम्पन्न गर्न नसकेपछि ठेकेदार कम्पनीको जमानत जफत गरिएको छ।
सडक निर्माणको जिम्मा पाएको पिआर/ओमबुद्ध जेभी बसुन्धरा काठमाडौँ को मोबिलाइजेशन पेस्कीबापतको बैंक जमानत पूर्वाधार विकास कार्यालय पर्वतले जफत गरी असुल गरेको हो।
२०७८ साल जेठ १८ गते सम्झौता भएको सो सडक आयोजना १८ महिनाभित्र सम्पन्न गर्ने लक्ष्यसहित २०७९ साल फागुन १७ गतेभित्र सक्नुपर्ने थियो। तर, निर्माण व्यवसायीले सडक चक्ल्याउने बाहेक अन्य काम नगरेको कार्यालयले जनाएको छ। पटक–पटक म्याद थप गर्दा पनि काममा प्रगति नभएपछि अन्ततः २०८१ साल चैत २९ गतेसम्मको अन्तिम म्याद सकिएसँगै जमानत जफत गर्नुपरेको पूर्वाधार विकास कार्यालय पर्वतका प्रमुख सन्तोष अर्यालले जानकारी दिनुभयो।
कूल लागत ११ करोड २२ लाख ६६ हजार रुपैयाँ रहेको झण्डै ६ किलोमिटर लामो सो सडक आयोजनाको निर्धारित समयसम्म भौतिक र वित्तीय प्रगति दुवै ३५ प्रतिशत मात्रै भएको थियो। कार्यालयले पटक–पटक मौखिक र लिखित रूपमा पत्राचार गर्दा पनि निर्माण कम्पनीले काममा सहभागिता जनाएन।
निर्माण सुरु गरेरै सम्पर्कबिहीन बनेपछि सडक झनै अस्तव्यस्त बनेको महाशिला गाउँपालिकाका अध्यक्ष ईश्वरीप्रसाद भुसालले बताउनुभयो। उहाँका अनुसार निर्माण कम्पनीले नाली व्यवस्थापन नगरी भत्काएर छाडेकाले गाउँपालिकाको कार्यालय रहेको काफलडाँडा क्षेत्र र बालाकोट–होश्राङदीका बासिन्दा दैनिक आवतजावतमा समस्या भोगिरहेका छन्।
निर्माण कम्पनीले यसअघि नै चार करोड १३ लाख रुपैयाँ भुक्तानी लिइसकेको थियो। जमानत जफत भए पनि कम्पनी सम्पर्कमा नआएकोले थप कारबाही प्रक्रिया अघि बढाइएको कार्यालयले जनाएको छ।
गण्डकी प्रदेश सरकारको रणनीतिक सडक आयोजनाअन्तर्गत पर्ने यो सडक लामो समयदेखि अलपत्र रहेकाले ठेकेदार कम्पनीमाथि कडा कारबाही गर्नुपर्ने स्थानीयवासीहरूले माग गरेका छन्।
तपाईको प्रतिक्रिया
