बारा :- बाराको प्रादेशिक अस्पताल कलैयामा थप एक जनामा हैजाको संक्रमण पुष्टि भएको छ। संक्रमण देखिएका ती बिरामीको अवस्था गम्भीर भएकाले उनलाई विशेष उपचार कक्ष (ICU) मा राखी उपचार भइरहेको अस्पतालका डा. ओम प्रकाश कुश्वाहाले जानकारी दिनुभयो।
हिजो साँझ शरीरमा पानीको मात्रा अत्यधिक कम भएपछि बिरामी सुकेको जस्तो देखिएका थिए। तत्काल आइसियुमा राखेर उपचार थालिएको र हाल स्वास्थ्यकर्मीको निगरानीमा उपचार भइरहेको अस्पतालले जनाएको छ। पखाला लागेर अस्पताल पुगेका कलैया उपमहानगरपालिका–१९ का ४५ वर्षीय पुरुषमा आरडिटि परीक्षण पोजेटिभ आएको हो। हिजो मात्र अस्पतालमा झाडापखालाका १० जना बिरामी आए पनि उनीहरूमा हैजा पुष्टि नभई सामान्य उपचारपछि घर फर्किएका छन्।
यसअघि बुधवार प्रादेशिक अस्पतालमा उपचाररत कलैया उपमहानगरपालिका–१८ पतौराका एक पुरुषमा पनि हैजा पुष्टि भएको थियो। उनी उपचारपछि बिहीबार बेलुकी डिस्चार्ज भएका छन्।
स्वास्थ्यकर्मीहरूले हैजाबाट बच्न उमालेर मात्र पानी पिउन, सरसफाइमा ध्यान दिन, राम्ररी पकाएको खाना मात्र खान, खाना खानुअघि र दिसापछि साबुनपानीले हात धुन, भाँडा वा ट्याङ्की ढाकेर राख्न र वरिपरि सफा राख्न सबैलाई आग्रह गरेका छन्।
जिल्लामा हैजाको संक्रमण देखिएपछि बिहीबार प्रादेशिक अस्पतालका निमित्त प्रमुख डा. विप्लब सुबेदीको अध्यक्षतामा बसेको रेपिड रेस्पोन्स टिमको बैठकले आइसियुलाई हैजाका बिरामी मात्रका लागि छुट्याउने र सात सदस्यीय रेपिड रेस्पोन्स टिम गठन गर्ने निर्णय गरेको छ।
बाराका स्थानीय निकायहरूले सूचना जारी गरी हैजाबाट सचेत हुन, मासु तथा अन्य खाद्य पसलमा सरसफाइमा ध्यान दिन र संक्रमण फैलन नदिन सतर्कता अपनाउन निर्देशन दिएका छन्।
यसैबीच, बाराको फेटा गाउँपालिकाले हैजा नियन्त्रणका लागि जनचेतनामूलक अभियान सुरु गरेको छ। गाउँपालिकाका अध्यक्ष रुस्तम अन्सारीका अनुसार स्वास्थ्यकर्मीलाई बस्ती–बस्तीमा परिचालन गरी घर–घरमै पुगेर सचेतना फैलाउने कार्यक्रम सञ्चालन भइरहेको छ।
स्वास्थ्यकर्मीहरूले दूषित खाना–पानी नखान, फलफूल तथा तरकारी राम्ररी धुने, सुरक्षित खानेपानी प्रयोग गर्ने र व्यक्तिगत सरसफाइमा ध्यान दिने सन्देश प्रचार गरिरहेका छन्। गर्मी र वर्षायाममा झाडापखालासहित हैजाको जोखिम बढ्ने भएकाले गाउँपालिकाले युद्धस्तरमै सचेतना अभियान अघि सारेको जनाएको छ।
तपाईको प्रतिक्रिया
