पर्सा:- वीरगञ्ज महानगर क्षेत्रमा समुदायस्तरमै हैजा फैलिएको छ । तर पनि यसको मूल स्रोत भने अहिलेसम्म पत्ता लाग्न सकेको छैन। गत शुक्रबारदेखि विभिन्न वडामा संक्रमित बिरामी भेटिन थालेका हुन्।
स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार आइतबार बेलुकीसम्म ७१ जना संक्रमित भेटिएका थिए भने सोमबार बिहान थप आठ जना थपिँदा कुल संख्या ७९ पुगेको छ। “विश्व स्वास्थ्य संगठनलगायतका टोलीले पानी परीक्षणलगायतका काम गरिरहेका छन्, आजभित्रै स्रोत पत्ता लाग्ने आशा छ,” उहाँले भन्नुभयो।
नारायणी अस्पतालका प्रवक्ता डा. उदयनारायण सिंहले आइतबारसम्म ३० जना बिरामी भर्ना भएको जानकारी दिनुभयो। उहाँका अनुसार श्यया र जनशक्ति अभावका कारण उपचारमा कठिनाइ भएको छ। “कागजी सहयोगको आश्वासन आएको भए पनि आवश्यक जनशक्ति र सामग्री अझै आइपुगेका छैनन्,” उहाँले गुनासो गर्नुभयो।
सिंहका अनुसार अस्पतालमा हैजा मात्र नभई सर्पदंश, ज्वरो, प्यारालाइसिसलगायतका बिरामीको चाप पनि बढेको छ। पर्याप्त जनशक्ति नहुँदा व्यवस्थापन गर्न गाह्रो भइरहेको र आन्तरिक–बाह्य दुवै सहयोग नआएको उनले बताए।
नारायणी अस्पतालमा गरिएको परीक्षणमा २६ जना, तराई अस्पतालमा २५ जना, नेशनल मेडिकल कलेजमा नौ जना, भवानी अस्पतालमा तीन जना तथा वीरगञ्ज हेल्थ केयर, अली अर्थो अस्पताल र मङ्गलम प्याथोलोजीमा दुई–दुई जनासहित आठ जना संक्रमित फेला परेका छन्। सोमबार विहान थप आठ जनामा संक्रमण पुष्टि भएको भए पनि उनीहरूको विवरण कुन अस्पतालमा परीक्षण भएको भन्ने खुल्न बाँकी छ।
तपाईको प्रतिक्रिया
