काठमाडौं :- नेपाल कम्युनिष्ट पार्टी (एमाले)को ११औं राष्ट्रिय महाधिवेशन आजदेखि भक्तपुरको सल्लाघारीस्थित खुल्ला चौरमा सुरु हुँदैछ। महाधिवेशनको उद्घाटन सत्रमा देशभरबाट करिब तीन लाख सहभागी हुने अपेक्षा गरिएको छ। पार्टीका प्रचार तथा प्रकाशन विभाग प्रमुख राजेन्द्र गौतमले महाधिवेशनको सम्पूर्ण तयारी पूरा भएको जानकारी दिएका छन्।
उद्घाटन समारोहमा नेपालको एकताको प्रतीकका रूपमा २०० भन्दा बढी कला र सांस्कृतिक झल्काउने झाँकी प्रदर्शन गरिने तयारी गरिएको छ। महाधिवेशनको उद्घाटनमा नेपाली कांग्रेसका सभापति शेरबहादुर देउवा, नेपाल कम्युनिष्ट पार्टीका संयोजक पुष्पकमल दाहाल ‘प्रचण्ड’ र १६ वटा अन्य पार्टीका अध्यक्ष एवं प्रतिनिधिहरूलाई निमन्त्रणा गरिएको छ।
महाधिवेशनको जनपरिचालनका सञ्चालक र एमाले स्थायी कमिटी सदस्य डा. राजन भट्टराईका अनुसार विभिन्न देशका कुटनीतिक नियोग र पार्टीका प्रतिनिधिहरूबाट शुभकामना सन्देश प्राप्त भइरहेको छ।
महाधिवेशनलाई शान्तिपूर्ण र व्यवस्थित वातावरणमा सम्पन्न गर्न ५०० भन्दा बढी स्वयंसेवक ‘ड्रेसकोड’मा खटिनेछन्। १०,000 तालिम प्राप्त स्वयंसेवकको सहयोगमा जनसेवामा थप सहजता ल्याउने तयारी गरिएको छ।
उद्घाटन समारोहको मञ्चमा लिच्छविकालमा राजा हरिदत्तले स्थापित चाँगुनारायण मन्दिरलाई मुख्य स्वरुपमा राखेर उपत्यकाका महत्वपूर्ण मन्दिरहरूको झलक प्रस्तुत गर्ने कलात्मक मञ्च निर्माण गरिएको छ। यस मञ्चको दायाँबायाँ ३० फिट अग्ला दुईवटा ‘एलइडी स्क्रिन’ राखिनेछन् जसले दूरदराजका सहभागीलाई पनि प्रष्ट देख्न र सुन्न मद्दत गर्नेछन्।
तीन किलोमिटर टाढासम्म सुन्न सकिने ११५ उच्च गुणस्तरका ‘साउन्ड सिस्टम’ जडान गरिएको छ। मञ्च अगाडि देशभरका नेता, मन्त्री, सांसद र कुटनीतिक नियोगका प्रतिनिधिहरूका लागि २५,000 कुर्सी राखिएका छन्।
महाधिवेशन उद्घाटनमा चाँगुनारायण मन्दिरको छेउमा विद्युतीय पाला राखिने र पार्टी अध्यक्ष केपी शर्मा ओलीले रिमोटद्वारा पालालाई बालेर महाधिवेशन उद्घाटन गर्ने तयारी गरिएको छ। यसका साथै, पार्टीको ११औं महाधिवेशन भएकाले ११ वटा झण्डा राखिनेछ, जसमा १० झण्डा सुरुमै फहराइने र एक झण्डा रिमोटबाट फहराइने व्यवस्था गरिएको छ।
उद्घाटन सत्रमा सहभागीका लागि विभिन्न जिल्लाबाट गाडीको व्यवस्था गरिएको छ। कोटेश्वरदेखि गट्ठाघरसम्म सवारी साधन जाने व्यवस्था गरिएको छ, जबकि गट्ठाघर र जगातीस्थित पार्किङ क्षेत्रमा सवारीको पार्किङको व्यवस्था गरिएको छ। उद्घाटन अघि गठ्ठाघर र जगातीबाट भव्य ¥याली गरेर आउने व्यवस्था पनि गरिएको छ।
तपाईको प्रतिक्रिया
