काठमाडौँ :- सञ्चार तथा सूचना प्रविधिमन्त्री जगदीश खरेलले ‘जेनजी’ आन्दोलनबाट निर्माण भएको वर्तमान सरकारको मुख्य कार्यादेश भनेको सबै राजनीतिक दल र जनताको सहभागितामा तोकिएको समयावधिमा प्रतिनिधिसभा निर्वाचन सम्पन्न गराउनु रहेको बताएका छन्।
राष्ट्रिय समाचार समिति (रासस)को भद्रकालीस्थित केन्द्रीय कार्यालयको आजको अवलोकन भ्रमणपछि आयोजित कार्यक्रममा मन्त्री खरेलले आगामी फागुन २१ गते हुने निर्वाचनको वातावरण निर्माण गर्न सबैसँग सहकार्य गर्न आग्रह गरे। उनले भने कि सरकारको तर्फबाट प्रधानमन्त्री सुशीला कार्कीले निर्वाचन गर्ने प्रतिबद्धता दिइसकेका छन् र सञ्चार क्षेत्रले यसमा महत्वपूर्ण योगदान दिने विश्वास गरिएको छ।
मन्त्री खरेलले थपे, “यो सरकार जेनजी आन्दोलनको मागअनुसार, सबै राजनीतिक दल र जनताको चाहनामा बनेको हो। निर्वाचनमा जाने सबै दल र जनताको चाहना यही हो। निर्वाचन आयोगले कार्यतालिका पनि प्रकाशन गरिसकेको छ। राससले पनि निर्वाचनको वातावरण बनाउन भूमिका खेल्नेछ भन्ने मेरो विश्वास छ।”
सरकारका प्रवक्तासमेत रहेका मन्त्री खरेलले भने कि यो सरकारको ‘म्यान्डेट’मा सुशासन कायम राख्ने, भ्रष्टाचार अन्त्य गर्ने, जेनजी आन्दोलनका क्रममा भएका जनधन क्षतिको छानबिन र कारबाही गर्ने, साथै प्राकृतिक विपद् पछिको राहत र पुनःस्थापना कार्यसम्पन्न गर्ने जिम्मेवारी पनि समावेश छ। उनले आगामी निर्वाचनको वातावरण तयार गर्न राजनीतिक दलहरुसँग प्रत्यक्ष तथा अप्रत्यक्ष संवाद भइरहेको जानकारी पनि दिए।
तपाईको प्रतिक्रिया
सम्बन्धित खवर
