नेपालगञ्ज :- निर्वाचन आयोगले मतदाता नामावली दर्ता खुला गरेपछि बाँकेमा तीन हजार ७७६ जना नयाँ मतदाता थपिएका छन्।
जिल्ला निर्वाचन कार्यालय बाँकेका प्रमुख टेकबहादुर शाहीका अनुसार राष्ट्रिय परिचयपत्रका आधारमा दुई हजार ५२९ जना र नागरिकताका आधारमा एक हजार २४७ जनाले मतदाता नामावलीमा नाम दर्ता गराएका छन्। राष्ट्रिय परिचयपत्रका आधारमा एक हजार ३७१ पुरुष र एक हजार १५८ महिला तथा नागरिकताका आधारमा ६५७ पुरुष र ५९० महिलाले नाम दर्ता गरेका छन्।
प्रमुख शाहीले आयोगको अर्को सूचना नआएसम्म मतदाता नामावली दर्ता निरन्तर जारी रहने जानकारी दिँदै पछिल्लो समय युवा पुस्ताको सहभागिता उल्लेखनीय रूपमा बढेको बताए। उनका अनुसार अनलाइनमार्फत सेवा लिनेको संख्या पनि बढ्दो छ।
कोहलपुर, राप्तीसोनारी, डुडुवा, नरैनापुर, जानकी र खजुरालगायत क्षेत्रबाट नियमित रूपमा मतदाता नाम दर्ता भइरहेको तथा त्रुटि सच्याउने र विवरण अद्यावधिक गर्ने कार्यसमेत जारी रहेको उनले बताए।
अन्तिम मतदाता नामावली प्रकाशन भएपछि मात्रै नयाँ थपिएका मतदाताको यकिन संख्या सार्वजनिक हुने उनले उल्लेख गरे। साथै, बाँकेबाट अन्य जिल्लाका मतदाताले पनि नाम दर्ता गराइरहेको जानकारी दिए।
विसं २०८२ को निर्वाचनसम्म बाँकेमा कुल तीन लाख ५० हजार ३७१ मतदाता दर्ता भएका थिए। तीमध्ये एक लाख ७२ हजार २२३ महिला, एक लाख ७८ हजार १३९ पुरुष र अन्य नौ जना रहेका थिए। जिल्लामा २०८२ चैत २२ गतेदेखि मतदाता नामावली दर्ता प्रक्रिया सुरु गरिएको थियो।
तपाईको प्रतिक्रिया
