काठमाडौँ :- नाइजेरियाको उत्तरी बेनु राज्यमा सप्ताहन्तमा भएको बन्दुकधारीको आक्रमणमा कम्तीमा १८ जनाको मृत्यु भएको छ। घटनापछि आक्रोशित स्थानीयवासीले विरोध प्रदर्शन गर्दै सडक अवरुद्ध गरेका छन्।
स्थानीय बासिन्दा र अधिकारीहरूका अनुसार आइतबार बिहान ओटुक्पो स्थानीय प्रशासन क्षेत्रअन्तर्गत पर्ने ओटुक्पो–नोबी समुदायमा बन्दुकधारी समूहले आक्रमण गरेको थियो। बिहान करिब ३:३० देखि ४:३० बजेसम्म भएको गोलीकाण्डमा स्थानीयले फुलानी गोठालासँग आबद्ध समूहको संलग्नता रहेको आशंका गरेका छन्।
यद्यपि, बेनु राज्य प्रहरीका प्रवक्ता उदेमे एडेटले घटनामा आठ जनाको मृत्यु र पाँच जना घाइते भएको बताएका छन्। स्थानीयवासी तथा अन्य अधिकारीहरूले भने मृतकको संख्या कम्तीमा १८ पुगेको दाबी गरेका छन्।
ओटुक्पो स्थानीय प्रशासनका प्रमुख म्याक्सवेल ओगिरीले दुई साताअघि गोठाला सङ्घका अध्यक्षको हत्या भएपछि उत्पन्न तनावसँग यो हिंसा सम्बन्धित हुन सक्ने बताएका छन्। घटनाको जिम्मेवारी भने हालसम्म कुनै पनि समूहले लिएको छैन।
तपाईको प्रतिक्रिया
