काठमाडौं :- काठमाडौँको गोङ्गबुस्थित नयाँ बसपार्कमा मानव बेचबिखन तथा लागुऔषध दुव्र्यसनविरुद्ध सचेतना फैलाउने उद्देश्यले सप्ताहव्यापी अभियान सुरु गरिएको छ।
प्रहरी प्रभाग नयाँ बसपार्क र सामुदायिक सेवा केन्द्र गोङ्गबुले सोमबार आयोजना गरेको कार्यक्रममा मानव बेचबिखन रोकथाम र युवालाई लागुऔषध दुव्र्यसनबाट जोगाउन विभिन्न सचेतनामूलक कार्यक्रम सञ्चालन गरिने जानकारी दिइयो।
कार्यक्रममा उपत्यका प्रहरी कार्यालय रानीपोखरीका प्रमुख प्रहरी अतिरिक्त महानिरीक्षक (एआईजी) सुशीलसिंह राठौरले अपराधमुक्त र सुरक्षित समाज निर्माणका लागि प्रहरी र नागरिकबीचको सहकार्य अपरिहार्य रहेको बताए। उनले युवा पुस्तामा बढ्दो लागुऔषधको लत र मानव बेचबिखनका घटनालाई नियन्त्रण गर्न सबै पक्ष एकजुट हुनुपर्नेमा जोड दिए।
जिल्ला प्रहरी परिसर काठमाडौँका प्रमुख प्रहरी वरिष्ठ उपरीक्षक (एसएसपी) दिलीप घिमिरेले गोङ्गबु बसपार्क क्षेत्रलाई लागुऔषध दुव्र्यसन र मानव बेचबिखनबाट सुरक्षित बनाउन सामूहिक प्रयास आवश्यक रहेको बताए।
नेपाल यातायात व्यवसायी राष्ट्रिय महासङ्घका अध्यक्ष पुण्यप्रसाद सिटौलाले सार्वजनिक यातायातमार्फत लागुऔषध ओसारपसार हुने जोखिम रहेको उल्लेख गर्दै चालक तथा सहचालकले यात्रु चढाउँदा विशेष सतर्कता अपनाउनुपर्ने बताए।
टोखा नगरपालिका–९ का अध्यक्ष रामभक्त घिमिरेले गोङ्गबु क्षेत्रलाई अपराधमुक्त बनाउन स्थानीय सरकारले प्रहरीसँग सहकार्य गर्दै आएको बताए।
प्रहरी प्रभाग नयाँ बसपार्कका प्रमुख शङ्कर श्रेष्ठका अनुसार अभियानअन्तर्गत एक सातासम्म गोङ्गबु बसपार्क क्षेत्रका होटल, रेस्टुरेन्ट, दोहोरी, विद्यालय तथा सार्वजनिक स्थानमा मानव बेचबिखन र लागुऔषधविरुद्ध विभिन्न सचेतनामूलक कार्यक्रम सञ्चालन गरिनेछ।
कार्यक्रममा महर्षि कलेज पवित्रनगर र बीएसटी कलेज बसपार्कका विद्यार्थीहरूको सहभागिता रहेको थियो।
तपाईको प्रतिक्रिया
सम्बन्धित खवर
