काठमाडौं :- कृषि तथा वातावरण मन्त्री गीता चौधरीले राष्ट्रिय स्वतन्त्र पार्टी (रास्वपा)को केन्द्रीय सदस्य पदमा उम्मेदवारी दिने घोषणा गरेकी छन्।
चितवनको भरतपुरमा जारी रास्वपाको प्रथम राष्ट्रिय महाधिवेशनअन्तर्गत सोमबार उनले निकटस्थ नेता–कार्यकर्तामाझ केन्द्रीय सदस्य पदमा उम्मेदवारी घोषणा गरेकी हुन्।
उम्मेदवारी घोषणा गर्दै चौधरीले किसान, भूमिहीन, सीमान्तकृत समुदाय तथा तल्लो तहका नागरिकहरूको आवाज पार्टी नेतृत्वसम्म पुर्याउने उद्देश्यले चुनावी मैदानमा उत्रिएको बताइन्। उनले पार्टीलाई थप समावेशी, किसानमैत्री र जनमुखी बनाउन आफूलाई प्रतिनिधिहरूको साथ र समर्थन आवश्यक रहेको उल्लेख गरिन्।
कञ्चनपुरकी स्थायी बासिन्दा तथा हाल कृषि तथा वातावरण मन्त्री रहेकी ३३ वर्षीया चौधरीले सामान्य किसान परिवारबाट संघर्ष गर्दै यहाँसम्म आइपुगेको स्मरण गरिन्। थारु समुदायकी छोरीका रूपमा सामाजिक विभेद, अभाव र सीमान्तकृत वर्गको पीडा नजिकबाट अनुभव गरेको भन्दै ती समुदायको प्रतिनिधित्व सशक्त बनाउन उम्मेदवारी दिएको उनको भनाइ छ।
आर्थिक अभावका बीच अध्ययन पूरा गरेकी चौधरीले कानुन विषयमा स्नातकोत्तर तहसम्मको शिक्षा हासिल गरेकी छन्। अधिवक्ताका रूपमा उनले कञ्चनपुर तथा आसपासका क्षेत्रमा १५० भन्दा बढी गरिब, दलित तथा सीमान्तकृत नागरिकलाई निःशुल्क कानुनी सहायता प्रदान गरेकी थिइन्।
राजनीतिक यात्रा विद्यार्थी राजनीतिबाट सुरु गरेकी चौधरी २०६२/०६३ को जनआन्दोलनपछि सक्रिय राजनीतिमा प्रवेश गरेकी हुन्। समावेशी प्रतिनिधित्व र नयाँ पुस्ताको नेतृत्व स्थापित गर्ने बहस चलिरहेका बेला उनको उम्मेदवारीलाई पार्टीभित्र अर्थपूर्ण रूपमा हेरिएको छ।
तपाईको प्रतिक्रिया
सम्बन्धित खवर
