काठमाडौँ :- अन्नपूर्ण आधार शिविरमा गत असोजको अन्तिम सातादेखि सुरु भएको पर्यटकको लर्को कात्तिक दोस्रो हप्तासम्म पनि निरन्तर छ। यस वर्ष यी स्थानमा यति धेरै पर्यटक आउलान भन्ने कसैले कल्पना गरेको थिएन। मुस्ताङ, म्याग्दी, बागलुङ र पर्वतका होटलहरू हालभरिभराउ भएका छन् र होटल सञ्चालकका लागि आवास व्यवस्थापन चुनौतीपूर्ण बनेको छ।
दसैँ, तिहार, छठलगायतको लामो बिदामा विद्यार्थी, युवा, कर्मचारी, बैंक तथा वित्तीय संस्था कर्मचारी, साथै विदेशबाट जन्मथलोमा फर्किएका पर्यटकहरूले मुस्ताङ र अन्नपूर्ण आधार शिविरलाई प्राथमिक गन्तव्यको रूपमा रोजेका छन्। स्थलमार्गबाट घुम्न आएका आन्तरिक पर्यटकको पहिलो रोजाइ मुक्तिनाथ दर्शन रहेको छ।
मुस्ताङमा पर्यटकले कोरला नाका, लोमान्थाङ दरबार, छोसेर र चिउँसी गुफा, चराङ र मराङ गुम्बा, कागबेनी, ढुम्बाताल र मार्फा गाउँको भ्रमण गर्छन्। यहाँ प्रत्येक वर्ष आठ लाख भन्दा बढी आन्तरिक र डेढ लाखभन्दा बढी विदेशी पर्यटक भ्रमण गर्छन्।
अन्नपूर्ण हिमालको आधार शिविरमा पुग्न फुतफुते झरना र पञ्चकुण्ड ताल हुँदै ४,१९० मिटर उचाइको यात्रा गर्नुपर्छ। छोटो समयमा आधार शिविर पुगेर फर्किन तीन दिन पर्याप्त हुन्छ। नयाँ गन्तव्यका रूपमा अन्नपूर्ण आधार शिविरमा दैनिक ५०० भन्दा बढी पर्यटक पुग्छन्।
होटल व्यवसायीहरूले भने, यस वर्ष दसैँ–तिहारमा मुस्ताङ र आधार शिविर जाने पर्यटकको सङ्ख्या कल्पनाभन्दा बढी भएको बताउँदै, “अग्रिम बुकिङ नभए होटल र होमस्टेहरूले पाहुनालाई पर्याप्त व्यवस्था गर्न सकिरहेका छैनन्,” भनी बताए।
म्याग्दी र मुस्ताङका प्रशासन, सुरक्षा निकाय, होटल व्यवसायी र उद्योग वाणिज्य सङ्घले अग्रिम बुकिङ गरेर आउने पर्यटकलाई कुश्मा, बागलुङ र पोखराका होटल, सामुदायिक भवन तथा धर्मशालामा बसोबासको व्यवस्था मिलाएका छन्।
सडक यातायातको सहज पहुँच, प्रचार–प्रसार, हिमाली र पहाडी क्षेत्रको साहसिक यात्रा, मुक्तिनाथको तीर्थयात्रा र सामाजिक सञ्जालमा पर्यटनस्थलको प्रचारले यी गन्तव्यलाई आन्तरिक पर्यटकको रोजाइमा राखेको म्याग्दी उद्योग वाणिज्य सङ्घका अध्यक्ष सुविन श्रेष्ठले बताए।
पर्यटक आगमनले होटल व्यवसायीलाई क्षमता र सुविधा विस्तार, नयाँ लगानीको सम्भावना र राज्यलाई आधार शिविरको पदमार्गमा होटल क्षमताको वृद्धि गर्न दबाब दिने गरेको छ। बेनी–जोमसोम सडक खण्ड सुधार, पदमार्ग होटलको वर्गीकरण, यातायात भाडादरमा एकरुपता, सञ्चार तथा विद्युत् सुविधा व्यवस्थापनको आवश्यकता पर्यटकहरूले औल्याएका छन्। गण्डकी प्रदेशसभा सदस्य हरिबहादुर भण्डारीले तीनै तहका सरकार, निजी क्षेत्र र सरोकारवालासँग समन्वय गरी समस्या समाधानको पहल गरिने बताए।
तपाईको प्रतिक्रिया
