काठमाडौँ :- तीन तहका सरकारबीच समन्वय, कार्यगत स्पष्टता र सेवा प्रवाहलाई प्रभावकारी बनाउने उद्देश्यले आयोजित सूचना तथा सञ्चार क्षेत्रसम्बन्धी विषयगत समितिको बैठकले सञ्चार क्षेत्र सुधार तथा डिजिटल रूपान्तरणका विभिन्न महत्वपूर्ण निर्णय गरेको छ।
सङ्घ, प्रदेश र स्थानीय तह (समन्वय तथा अन्तरसम्बन्ध) ऐन, २०७७ अन्तर्गत गठित समितिको बैठकले सञ्चार क्षेत्रलाई सङ्घीय संरचनाअनुसार पुनःसंरचना गर्ने, पुराना कानुन संशोधन गर्ने तथा एकीकृत डिजिटल प्रणाली विकास गर्ने निर्णय गरेको हो।
बैठकले सञ्चार क्षेत्रभित्र देखिएका दोहोरो संरचना, कानुनी अस्पष्टता र सेवा प्रवाहमा देखिएको जटिलता हटाउन नीति तथा संरचनागत सुधार आवश्यक रहेको निष्कर्ष निकालेको छ।
त्यसैगरी अनलाइन मिडियाको दर्ता तथा नवीकरण, विज्ञापन प्रणाली सुधार, रेडियो लाइसेन्स व्यवस्थापन, हुलाक सेवालाई आधुनिक सरकारी कुरियर सेवाका रूपमा रूपान्तरण गर्ने तथा सञ्चार डाटाबेसलाई एकीकृत गर्ने निर्णय पनि गरिएको छ।
बैठकमा सञ्चारमन्त्रीले बदलिँदो प्रविधिअनुसार कानुनी ढाँचा अद्यावधिक गर्नुपर्ने आवश्यकता औंल्याउँदै सेवा प्रवाहलाई प्रभावकारी बनाउन तीन तहबीच सहकार्य अपरिहार्य रहेको बताए।
यसका साथै चलचित्र, दूरसञ्चार, विज्ञापन र डिजिटल सामग्री उत्पादनलाई उद्योगका रूपमा विकास गर्ने, मिथ्या सूचना नियन्त्रण गर्ने तथा मातृभाषामा सञ्चार सामग्री प्रवर्द्धन गर्ने विषयमा पनि सहमति जुटाइएको छ।
बैठकले निर्णय कार्यान्वयनको नियमित अनुगमन प्रणाली विकास गर्ने निर्णयसमेत गरेको छ।
तपाईको प्रतिक्रिया
