सङ्खुवासभा :- सङ्खुवासभाको मकालु गाउँपालिका–५, मुढेमा ट्याक्टरले किच्दा एक जना मजदुरको मृत्यु भएको छ।
गएराति ना ५ त ७०८१ नम्बरको ट्याक्टरले उत्तर–दक्षिण कोशी राजमार्गमा कार्यरत मजदुर नेमलाल तामाङलाई किच्दा घटनास्थलमै मृत्यु भएको जिल्ला प्रहरी कार्यालय सङ्खुवासभाका प्रहरी नायब उपरीक्षक कुमारप्रसाद मैनालीले जानकारी दिनुभयो।
प्रहरीका अनुसार गुडिरहेको ट्याक्टरबाट खस्नुभएका तामाङलाई पछाडिको टायरले किचेको थियो। मृतक तामाङ उत्तर–दक्षिण कोशी राजमार्गअन्तर्गत निर्माणाधीन खाँदबारी–किमाथाङ्का सडकखण्डमा कार्यरत मजदुर हुनुहुन्थ्यो।
घटनापछि सिन्धुली घर भई हाल सङ्खुवासभा बस्दै आएका ट्याक्टर चालक फरार रहेको जिल्ला प्रहरी कार्यालयले जनाएको छ। घटनाको जानकारी पाउनासाथ प्रहरी निरीक्षक मेघराज अर्यालको नेतृत्वमा प्रहरी टोली घटनास्थलतर्फ खटिएको थियो।
प्रहरीले ट्याक्टर मकालु गाउँपालिका–५ स्थित नुम बजारमा पार्किङ गरी राखिएको अवस्थामा नियन्त्रणमा लिएको नुम प्रहरी चौकीले जनाएको छ। घटनास्थल नुम प्रहरी चौकीबाट करिब १५ किलोमिटर दूरीमा रहेको छ।
मृतकको शव जिल्ला अस्पताल खाँदबारी ल्याउने तयारी भइरहेको छ। फरार चालकको खोजी तथा घटनासम्बन्धी थप अनुसन्धान भइरहेको जिल्ला प्रहरी कार्यालयले जनाएको छ।
तपाईको प्रतिक्रिया
सम्बन्धित खवर
