बाँके :- नेपाल प्रहरीका महानिरीक्षक दानबहादुर कार्कीले प्रहरी सेवाहरूलाई अझ गुणस्तरीय, संवेदनशील र पीडितमैत्री बनाउन निर्देशन दिनुभएको छ। बिहीबार इलाका प्रहरी कार्यालय, कोहलपुर परिसरमा निर्माण गरिएको महिला, बालबालिका तथा ज्येष्ठ नागरिक सेवा केन्द्रको नवनिर्मित भवनको उद्घाटन गर्दै उहाँले यस्तो निर्देशन दिनुभएको हो।
महानिरीक्षक कार्कीले प्रहरी सेवाको स्वरूप क्रमशः परिवर्तन हुँदै गएको उल्लेख गर्दै अब प्रहरी कारबाहीमुखी मात्र नभई सेवा र सहयोगमुखी संस्थाका रूपमा अघि बढिरहेको बताउनुभयो। उहाँले पीडितको मनोविज्ञान बुझेर संवेदनशीलता र मानवताका आधारमा सेवा प्रवाह गर्न यस्ता संरचनाले महत्वपूर्ण भूमिका खेल्ने धारणा व्यक्त गर्नुभयो।
बेलायत सरकारको सहयोगमा सञ्चालित एसजेपी कार्यक्रमअन्तर्गत युनोप्सद्वारा निर्माण गरिएको उक्त भवन महिलासहित बालबालिका तथा ज्येष्ठ नागरिकलाई लक्षित सेवाहरूलाई थप प्रभावकारी, सुरक्षित र सहज बनाउने उद्देश्यले निर्माण गरिएको हो।
केन्द्रमार्फत सेवाग्राहीले परामर्श, उजुरी दर्ता, अस्थायी आश्रय तथा आवश्यक कानुनी प्रक्रियासम्बन्धी सेवा एउटै स्थानबाट प्राप्त गर्न सक्नेछन्। प्रहरीले पीडितको गोपनीयता, सम्मान र सुरक्षालाई उच्च प्राथमिकतामा राखेर सेवा प्रदान गर्ने महानिरीक्षक कार्कीले स्पष्ट पार्नुभयो।
उद्घाटन समारोहमा युनोप्सका अपरेसन कोअर्डिनेटर इन्द्र न्यौपानेले स्वागत मन्तव्य राख्नुभएको थियो भने युनोप्सका इन्फ्रास्ट्रक्चर म्यानेजर शिशिर उपाध्यायले भवन निर्माणसम्बन्धी प्रतिवेदन प्रस्तुत गर्नुभएको थियो। कार्यक्रममा युनोप्स नेपालका कन्ट्री म्यानेजर कोमल कार्की र बाँकेका प्रमुख जिल्ला अधिकारी विपीनकुमार तामाङले पनि मन्तव्य राख्नुभएको थियो।
करिब २८७.२५ वर्ग मिटर क्षेत्रफलमा फैलिएको उक्त भवनको निर्माण लागत रु दुई करोड १४ लाख ७३ हजार १०७ रुपैयाँ ६१ पैसा रहेको छ। भवन निर्माणसम्बन्धी सम्झौता २०८१ साउन १० गते सम्पन्न भएको हो भने निर्माण कार्य रोयल कन्स्ट्रक्सन, धनगढी (कैलाली) ले पूरा गरेको हो।
भवनको भुइँ तल्लामा कार्यालय प्रमुख कक्ष, परामर्श कक्ष, पीडित आश्रय कक्ष, सोधपुछ तथा स्वागत कक्ष, बालबालिका कक्ष, बैठक कक्ष तथा प्रशासन अभियोजन कक्ष रहेका छन्। पहिलो तल्लामा प्रमुख आवास, भान्सा तथा भोजन कक्ष, दुईवटा प्रहरी ब्यारेक र दुईवटा शौचालयको व्यवस्था गरिएको छ। भवन निर्माणमा योगदान पुर्याउने व्यक्तित्वहरूलाई समारोहका प्रमुख अतिथिद्वारा प्रशंसा पत्र प्रदान गरिएको थियो।
तपाईको प्रतिक्रिया
सम्बन्धित खवर
