काठमाडौं :- पाँचखाल–सुनकोसी खानेपानी आयोजना तीन वर्षको निर्धारित समयसीमाभन्दा ढिलो भएर अन्तिम चरणमा पुगेको छ। हालै, पाँचखाल नगरपालिकाका छ हजार परिवारलाई खानेपानी पुर्याइएको छ, जसका कारण कुल ३१ हजार नागरिकलाई यस आयोजनाबाट लाभ हुनेछ।
आयोजनाको भौतिक संरचनामा करिब ९९ प्रतिशत प्रगति हासिल भएको छ। यस आयोजना निर्माण गर्दा बाढी र पहिरोका कारण केही अवरोधहरू आएपछि, मर्मत र पुनर्निर्माण कार्य गरिएको थियो। सुनकोशी नदीको स्रोतबाट पानी ल्याएर पाँचखाल–९ डाँडागाउँमा ३९ लाख लिटर क्षमताको पानी प्रशोधन केन्द्र र ओभरहेड ट्याङ्की निर्माण गरिएको छ। हालै पानीको परीक्षण सकिएर औपचारिक रूपमा लक्षित बस्तीसम्म वितरण सुरु गरिएको छ।
खानेपानी उपभोक्ता समितिका अध्यक्ष कुमार लामिछानेले भने, “आयोजना अन्तिम चरणमा पुगेको छ, र पुस दोस्रो सातासम्म यसलाई पूर्ण रूपमा सञ्चालनमा ल्याउने लक्ष्य राखेका छौँ।”
स्रोतबाट प्रतिसेकेण्ड ८४ लिटरको दरले पानी प्रशोधन गर्दै उपभोक्ताका घरसम्म पानी पठाइएको छ। समितिका अनुसार, गत वर्षको असोजमा आएको बाढीले आयोजनामा ठूलो क्षति पुर्याएको थियो। ७५ मिटरको पर्खाल भत्किएको र ४८ स्थानमा पाइप लाइन र संरचनामा रु १ करोड ७० लाखको क्षति पुगेपछि योजना असफल भएको थियो। तर दातृ निकायसँगको समन्वयमा थप समयावधि दिइएकाे थियो, र अब आयोजना सफलतापूर्वक पूर्ण हुँदैछ।
समिति अध्यक्ष लामिछानेका अनुसार, अब प्रतिघण्टा तीन लाख दुई हजार ४०० लिटर पानी सहज रूपमा तान्न सकिनेछ, र २० घण्टासम्म निरन्तर पानी तान्दा ६० लाख ४८ हजार लिटर पानी आपूर्ति गर्न सकिनेछ।
यस आयोजनामा सुनकोशी नदी किनारमा ६ वटा इनार, ४ लाख लिटर क्षमताका २ वटा पानी सङ्कलन ट्याङ्की, ३ लाख लिटरको ओभरहेड ट्याङ्की, १० वटा नयाँ वितरण ट्याङ्की र १५ वटा पाले घर निर्माण गरिएको छ। साथै, २१४ विपन्न वर्गका उपभोक्ताले स्थानीय सहकारी संस्थाबाट ऋण लिई पानीको लागि रकम बुझाएका छन्।
आयोजनाको कुल लागत रु १ अर्ब ४७ करोड ४३ लाख ६० हजार रहेको छ, र यसबाट २०४० सम्म ४५ हजार नागरिक लाभान्वित हुने अनुमान गरिएको छ। आयोजनाले दैनिक प्रतिव्यक्ति १९२ दशमलव ०५ लिटर पानी आपूर्ति गर्ने प्रक्षेपण गरेको छ।
सम्झौताअनुसार दातृ निकाय र नेपाल सरकारसँगको सहकार्यमा ५ प्रतिशत परिवारले प्रतिपरिवार रु १८ हजारका दरले रकम बुझाएका छन्।
तपाईको प्रतिक्रिया
सम्बन्धित खवर
