काठमाडौँ :- नेपाल कम्युनिष्ट पार्टी (एमाले)को ११औँ महाधिवेशनको उद्घाटनस्थल भक्तपुरको सल्लाघारीमा अस्थायी संरचना निर्माण कार्य तीव्रता लिएको छ। महाधिवेशन उद्घाटन हुन पाँच दिन मात्र बाँकी रहँदा उद्घाटनस्थलमा मञ्च, शौचालय, अतिथिहरूका लागि आवश्यक संरचनाहरू निर्माण भइरहेको नेकपा एमालेका पोलितब्यूरो सदस्य महेश बस्नेतले जानकारी दिएका छन्।
महेश बस्नेतका अनुसार, भक्तपुरको मौलिक पहिचान झल्काउने परम्परागत शैलीमा मञ्च र अन्य संरचनाहरू निर्माण कार्य तीव्र गतिमा भइरहेको छ। उद्घाटनका दिनमा लगभग पाँच लाख व्यक्तिको सहभागीता हुने अपेक्षा गरिएको छ।
उद्घाटनस्थलमा १० हजार स्वयंसेवक परिचालन हुनेछन्, जसमा ५५० जना स्वयंसेवक विशेष पोसाकसहित उपस्थित हुनेछन्। युवा सङ्घले ५० हजार कार्यकर्तालाई उद्घाटनस्थलमा ल्याउनेछ भने नेसनल भोलियन्टरले १० हजार कार्यकर्तालाई स्वयंसेवकका रूपमा परिचालन गर्ने निर्णय गरेको छ।
महाधिवेशनमा सहभागी हुने प्रतिनिधिहरूका सवारी साधनलाई व्यवस्थापन गर्न विभिन्न स्थानहरूमा पार्किङको व्यवस्था गरिएको छ। भक्तपुरको जगाती क्षेत्रदेखि इँटा–टायल कारखाना र स्थानीय प्लटिङमा पार्किङ गरिनेछ। र्यालीसहित सल्लाघारी उद्घाटनस्थलमा आउने सवारी साधनलाई मध्यपुरथिमिको गट्ठाघरस्थित नागरिक उड्डयन प्राधिकरणको खाली जग्गा र कमेरोटार क्षेत्रका खाली जग्गामा पार्किङ गरिने व्यवस्था गरिएको छ।
महाधिवेशनमा करिब २,५०० प्रतिनिधिको सहभागिता रहनेछ, जसमा पाँच प्रतिशत प्रतिनिधि मनोनीत हुनेछन्। मनोनीत प्रतिनिधिहरूको चयन प्रक्रिया शीर्ष नेताहरूको टोलीले गरिरहेको बस्नेतले जानकारी दिएका छन्। यस पटकको महाधिवेशनमा जेनजी (जनरेशन Z) युवाहरूसँगको सहभागीता बढी रहनेछ, र केन्द्रीय कमिटीमा पनि जेनजीको प्रतिनिधित्व सुनिश्चित गरिने कुरा पनि उनले बताए।
महाधिवेशनको उद्घाटन २०७८ मङ्सिर २७ गते १२ बजे पार्टी अध्यक्ष केपी शर्मा ओलीद्वारा गरिनेछ। बन्द सत्र र निर्वाचन २८ र २९ मङ्सिरमा भृकुटीमण्डपमा सम्पन्न हुनेछ, जहाँ नयाँ केन्द्रीय कमिटी चयन हुनेछ।
तपाईको प्रतिक्रिया
सम्बन्धित खवर
