काठमाडौं :- गाजामा हमासको नियन्त्रणमा रहेका जीवित बन्धकहरूको सूचीमा नेपाली नागरिक विपिन जोशीको नाम समावेश भएको अन्तर्राष्ट्रिय सञ्चारमाध्यमहरूले पुष्टि गरेका छन्। हमास र इजरायलबीचको युद्धविराम योजनाको पहिलो चरणअन्तर्गत सोमबार बन्धक मुक्त गरिनु अघि सार्वजनिक गरिएको सूचीमा विपिनको नाम रहेको *वाशिङ्टन पोस्टले जनाएको हो। सो सूचनालाई टाइम्स अफ इजरायल, एपी लगायतका अन्तर्राष्ट्रिय माध्यमहरूले पनि उद्धृत गरेका छन्।
सार्वजनिक सूचीअनुसार जीवित रहेका सबै बन्धक पुरुष हुन्, जसमा एक जनाबाहेक सबै २० देखि ३० वर्ष उमेर समूहका छन्। यसअघि भएका युद्धविराम सम्झौताअनुसार महिला, बालबालिका र ५० वर्षभन्दा माथिका पुरुषलाई पहिल्यै मुक्त गरिएको छ।
हाल गाजामा ४८ जना बन्धक रहेको अनुमान गरिएको छ, जसमा अघिल्लो युद्धमा मारिएका एक इस्रायली सैनिकको शव पनि समावेश छ। इस्रायलका अनुसार कम्तीमा २५ जना बन्धक ७ अक्टोबर २०२३ को आक्रमणपछि मारिएका वा बन्दी अवस्थामा मृत्यु भएको पत्ता लागेको छ।
युद्धविराम शुक्रबारदेखि सुरु भइसकेको छ, र त्यसपछि बाँकी बन्धकहरूलाई ७२ घण्टाभित्र फिर्ता गरिने अपेक्षा गरिएको छ। यसको सट्टामा इस्रायलले करिब २,००० जना प्यालेस्टिनी कैदीलाई रिहा गर्ने सहमति भएको बताइन्छ।
सहमति अनुसार सोमबार स्थानीय समय दिउँसो १२ बजेभित्र (नेपाली समय अनुसार अपराह्न २:४५ बजे) विपिनसहित सबै ४८ जनालाई रिहा गरिसक्नुपर्ने व्यवस्था छ। तर, हमासले तोकिएको समयभित्र सबै बन्धक हस्तान्तरण गर्न नसकिने भन्दै थप समय मागेको छ।
यसअघि, विपिन जोशी हमासको कब्जामा रहेको देखिने एक पुरानो भिडियो सार्वजनिक भएको थियो, जसले उनको जीवित रहेको सम्भावना अझ बलियो बनाएको थियो।
तपाईको प्रतिक्रिया
सम्बन्धित खवर
