काठमाडौं :- गाजामा बन्धक रहेका सबैलाई सोमबारसम्म मुक्त गर्ने योजना बनाइएको छ। यो पहल हमास र इजरायलबीच भएको पहिलो चरणको युद्धविराम सम्झौताअन्तर्गत कार्यान्वयन गरिनेछ। अमेरिकी राष्ट्रपति डोनाल्ड ट्रम्पले बुधबार राति यसबारे जानकारी दिएका छन्।
हमास र उसका सहयोगीहरूले इजरायलबाट २५१ जना अपहरण गरेका थिए, जुन दुई वर्षभन्दा बढी समय भइसकेको छ। तीमध्ये हाल ४७ जना बन्धक गाजामा रहेका छन् र कम्तीमा २० जना जीवित रहेको विश्वास गरिन्छ। तर यस सूचीमा नेपालका विपिन जोशीको नाम छैन।
इजरायली सरकारले बाँकी ४८ मध्ये २६ जनालाई मृत घोषित गरिसकेको छ। बाँकी दुई जनाको, तामिर निम्रोडी र नेपाली विद्यार्थी विपिन जोशीको, अवस्था अझै सुनिश्चित छैन। इजरायली सरकारले उनीहरूको अवस्थाबारे गम्भीर चिन्ता व्यक्त गरेको छ।
मन्त्रालय स्रोतका अनुसार, “इजरायल सरकारको तर्फबाट विपिनको बारेमा जुनसुकै अवस्था सम्बन्धी सूचना आउन सक्छ, त्यसका लागि परिवारलाई तयार रहन सुझाव आएको छ।”
कञ्चनपुरका विपिन जोशी अध्ययनको सिलसिलामा इजरायल पुगेका थिए। उनी गत अक्टोबर ७ मा हमासले किबुत्ज क्षेत्रमा गरेको आक्रमणको क्रममा बन्धक बनाइएका थिए। सो आक्रमणमा १० जना नेपाली विद्यार्थी मारिएका थिए, र विपिनलाई हमासका लडाकुहरूले आफूसँगै लगेका थिए।
तपाईको प्रतिक्रिया
सम्बन्धित खवर
