भारत :- भारतमा लगातार भारी वर्षापछि पश्चिम बङ्गालका दुई प्रसिद्ध वन्यजन्तु निकुञ्ज बाढीको चपेटामा परेका छन्। गोरुमारा र जलदापारा राष्ट्रिय निकुञ्ज डुबानमा परेपछि बाघ, चितुवा र हात्तीको झुण्ड सुरक्षित स्थानतर्फ भागेका छन् । राज्य अधिकारीका अनुसार अक्टोबर ३ देखि भएको बाढी र भूस्खलनका कारण कम्तीमा ३६ जनाको मृत्यु भइसकेको छ । भारी वर्षाले सयौँ घर भत्किएका छन्, चिया बगान बगाएका छन् र सडकहरू अवरुद्ध भएका छन् ।
यी निकुञ्जहरू हिमाली फेदमा अवस्थित छन्, जहाँ हात्ती, अर्ना, बाघ र लुप्तप्राय एकसिङ्गे गैँडासहितका दुर्लभ जनावरहरू बसोबास गर्छन्। “बाढीको कारण दुईवटा वन्यजन्तु निकुञ्ज डुबेका छन्, जसका कारण जनावरहरू सुरक्षित स्थानतर्फ निस्कन बाध्य भएका छन्,” पश्चिम बङ्गालका वनमन्त्री वीरबाह हंसडाले जानकारी दिए । उनका अनुसार करिब ३० हात्तीको झुण्ड बाढीबाट भागिरहेको देखिएको थियो ।
मन्त्रीका अनुसार एउटा चितुवा धमिलो पानीमा देखिए पनि त्यसपछि हराएको छ, र केही जनावरहरू भाग्न नपाई बाढीमै फसेका छन् । “नदी किनारमा मरेका जनावरहरूको शव भेटिन थालेका छन्,” उनले बताए । तीमध्ये दुई चितुवा, एउटा गैँडा र धेरै अर्ना तथा हरिण रहेका छन् । यद्यपि केही जनावरहरूको सफल उद्धार गरिएको छ ।
“नदी किनारमा फसेको एउटा वयस्क गैँडा र दुई हात्तीका छावाहरूलाई उद्धार गर्न दुईवटा प्रशिक्षित बन्दी हात्ती प्रयोग गरिएको थियो,” हंसडाले थपे । भारतमा एकसिङ्गे एसियाली गैँडाको जनसङ्ख्या पछिल्ला चार दशकमा संरक्षण प्रयास र अवैध शिकारी नियन्त्रणका कारण लगभग तीन गुणाले वृद्धि भई हाल चार हजारभन्दा बढी पुगेको जनाइएको छ ।
तपाईको प्रतिक्रिया
सम्बन्धित खवर
