काभ्रे :- अरनिको राजमार्गअन्तर्गत सूर्यविनायक–धुलिखेल सडकखण्डको काभ्रेपलाञ्चोकस्थित जनागाल–भैँसेपाटी भागमा कालोपत्र कार्य पुनः सुरु भएको छ। वर्षाका कारण रोकिएको काम बनेपा नगरपालिका–१० को जनागाल क्षेत्रबाट फेरि थालिएको हो।
सूर्यविनायक–धुलिखेल तथा धुलिखेल–सिन्धुली–बर्दिबास सडक आयोजनाका अनुसार भदौमा सिसिटीबीको काम सकिएपछि कालोपत्र अघि बढाइएको हो। असार र साउन महिनामा मनसुनका कारण विस्तार रोकिएको थियो। जनागालबाट भैँसेपाटीतर्फको कालोपत्रपछि साँगातर्फको सिसिटीबी पूरा भएलगत्तै निरन्तरता दिइने जनाइएको छ।
तर बनेपाको पुलबजार क्षेत्रमा स्थानीय अवरोधका कारण करिब छ महिनादेखि काम रोकिएको छ। करिब २०० मिटर क्षेत्रमा सेन्टर लाइनको विषयमा विवाद भएपछि विस्तार ठप्प भएको हो। बाटोको चौडाइ १५० फिट भए पनि स्थानीयले दुवैतर्फ घर बराबरी छुट्याउनुपर्ने माग गरेपछि समस्या उत्पन्न भएको बताइएको छ।
हाल बनेपाको पूर्वतर्फ चण्डेश्वरी खोलादेखि बनेपा चारदोबाटोसम्म करिब एक किलोमिटर सडकमा ढल निर्माण भइरहेको छ। पुलबजारबाहेक सूर्यविनायक–धुलिखेल सडकका अन्य स्थानमा साना खण्डमा काम जारी छ। एक किलोमिटर क्षेत्रमा सडक पक्की बनाउने, वाल, ड्रेन र पेभमेन्टको काम सकिएको र केही दिनमै बनेपातर्फ कालोपत्रको तयारी हुने जनाइएको छ।
भक्तपुरको सूर्यविनायकदेखि धुलिखेलसम्मको छ–लेन विस्तार समयमै पूरा नहुने भएको छ। आयोजनाका अनुसार बाँकी करिब चार महिनामा सम्पूर्ण विस्तार सम्पन्न गर्न सम्भव छैन।
१६ किलोमिटर लामो यो सडक विस्तार २०७९ पुस २४ गते सुरु गरिएको हो र ३६ महिनाभित्र सम्पन्न गर्ने योजना बनाइएको थियो। परियोजना सूर्यविनायक–साँगा र साँगा–धुलिखेल गरी दुई खण्डमा विभाजन गरी ठेक्का सम्झौताअनुसार विस्तार भइरहेको छ। हाल सूर्यविनायक–साँगा खण्डको ४० प्रतिशत र साँगा–धुलिखेल खण्डको ५० प्रतिशत काम सम्पन्न भइसकेको छ। बनेपाको सहरी क्षेत्रमा पुल तथा निजी घर विवादका कारण ढिलाइ भएको र समयसीमासम्म करिब ६५ प्रतिशत भौतिक प्रगति हुने अनुमान गरिएको छ।
साँगा–धुलिखेल ८.४ किलोमिटर सडक विस्तारका लागि पहिलो चरणमा रु ४ अर्ब ५ करोड ६४ लाख र दोस्रो चरणमा सूर्यविनायक–साँगा सडक विस्तारका लागि रु ३ अर्ब ८८ करोड ९३ लाखमा सम्झौता भएको हो।
तपाईको प्रतिक्रिया
सम्बन्धित खवर
